निःशुल्क डायलासिस संकटय्

येँ – थनिं न्ह्यः केपी शर्मा ओलीया हे सरकारया पालय् देय्न्यंकं च्वंपिं जलस्येँ (किडनी) या विरामीतय्त सितिकं डायलासिस यायेगु धकाः जूगु व्यवस्था आः बांलाक न्ह्याकेत समस्या जूगु खँ थीथी अस्पतालतय्सं धाःगु दु ।अस्पतालतय्सं धाः कथं डायलासिस यानागु वापत सरकारं बी धाःगु ध्यबा आः तक छ्वया महःगु कारणं अस्पतालतय्त थ्व सेवा सञ्चालन यायेत समस्या जूगु खः ।

निदँ न्ह्यः थीथी अस्पतालतय्त विरामीया डायलासिस यायेबलय् ध्यबा काये मते, माःगु ध्यबा सरकारं पुला बी धकाः निर्ण याना तःगु खः ।
सम्बद्ध अस्पतालतय्सं धाः कथं थ्व निःशुल्क सेवा सुरु यायेगु लागिं न्हापां ला सरकारं छक्वलं ४–५ लाख तका दां छ्वया नं बिउगु खः । तर लिपा छक्वः हे ध्यबा छ्वया महःगुलिं अज्याःगु सेवा बीगु याना वयाच्वंगु अस्पतालतय्त समस्या जूगु दु ।

सरकारं छम्ह मनूया डायलासिस यानागु वापत २५०० (नीन्यासः) तका दां बीगु धयातःगु खः । अज्याःपिं विरामीतय्गु ल्याः तयेबलय् आः हरेक अस्पतालतय्सं ४०–५० लाख स्वयां नं अप्वः ध्यबा काये मालेधुंकूगु दु । डायलासिसयात माःगु सामान फुक्क अस्पतालया थःगु हे श्रोतं न्याये माःगुलिं अस्पतालतय्त आर्थिक बोझ जूगु दु ।

गुलिखे अस्पतालतय्सं अज्याःगु सामान न्याये मफयाः आः डायलासिस सेवा हे बी मफइगु तकया खँ धया हःगु खँ नं सीदुगु दु ।
अस्पतालतय्सं डायलासिस वापतया ध्यबा छ्वया हये माल धकाः स्वास्थ्य मन्त्रालययात ताकेता यानाच्वंसां स्वास्थ्यं नं अर्थ मन्त्रालययात ताकेता यानाच्वना धकाः लिसः बिया हइगु खँ धाःगु दु ।

डायलासिस सेवा निःशुल्क जुइवं थ्व सेवा काइपिं मनूतय् ल्याः अप्वःगुया नापं देशय् जलस्येँया विरामीत नं अप्वःगुलिं दँय् गुलि मात्राय् बजेट अप्वयेका यंकेगु जुइ धकाः न्हूकथं बिचाः याये माःगु खँ नं धयाहःगु दु ।

ध्यबा छ्वयेत समस्या

डायलासिस यानागु वापतया ध्यबा छ्वया हइ जुइ धकाः अस्पतालत स्वास्थ्य मन्त्रालयया ख्वाः स्वयाच्वंगु दु । तर स्वास्थ्य मन्त्रालय धाःसा थुकिया लागिं अर्थ मन्त्रालयया ख्वाः स्वयाच्वंगु दु । अले अर्थ मन्त्रालय चाहिँ सरकारया ख्वाः स्वयाच्वंगु दु ।

निःशुल्क डायलासिस सेवाया लागिं धकाः सरकारं १ अर्ब २५ करोड तकाया बजेट फ्याःगु खः । तर दछिया दुने हे डायलासिस याइपिनि ल्याः अप्वल धकाः स्वास्थ्य मन्त्रालयपाखें विनियोजित बजेट स्वयां १ अर्ब तका अप्वः दां माग याना हल । थुलिमछि ध्यबा अप्वः माग जूगुलिं आः छु यायेगु धकाः अर्थं नं धाये मफयाच्वंगु खँ सीदुगु दु ।

सम्बन्धित बुखँ

LEAVE YOUR COMMENTS