इजलास गन धइगु खँय् निं वहस शुरु

येँ (नेपालभाषा टाइम्स) – संसद विघटन विरुद्ध सर्वोच्च अदालतय् लानाच्वंगु मुद्दा गुगु इजलासय् छ्वयेगु धइगु बारे वहस शुरु जूगु दु। संवैधानिक इजलाय् हे बहस यायेगु खः कि सर्वोच्च अदालतया पूर्ण इजलासय् वहस यायेगु खः धइगु बारे थ्व वहस केन्द्रित जूगु खः । रिट निवेदकपिं नेकपा संसदीय दलया प्रमुख सचेतक देव गुरुब सहित झिंनिम्हेस्यां संसद विघटन विरुद्धया मुद्दा बृहत् पूर्ण इजलासय् यंकेमाः धकाः लिखित माग याःगु दु। विपक्षीपिं राष्ट्रपति विद्यादेवी भण्डारीया पक्षय् वहस याःपिं महान्यायाधिवक्ता अग्नि खरेल व सुशीलकुमार पन्तं धाःसा संवैधानिक इजलासय् हे वहस यायेमाःगु जिकिर यानाच्वंगु दु ।

निगुलिं पक्षया वहस क्वमचाःगुलिं अदालतया वहस थौं नं जारी जुइगु खँ धाःगु दु। म्हिगः जूगु इजलासय् निवेदकपाखें वहस याःपिं फुक्क धइथें अधिवक्तातय्सं मुद्दाया फैसला पूर्ण बृहत् इजलासं यायेमाःगु जिकिर याःगु खः । रिट निवेदकपाखें पुलांम्ह महान्यायाधिवक्ता रमण श्रेष्ठ, शम्भु थापा, हरिहर दाहाल, दिनेश त्रिपाठी, चन्द्रकान्त ज्ञवालीपिंसं संवैधानकि इजलासया अधिकार क्षेत्रय् उगु मुद्दा मलाः धासें पूर्ण बृहत् इजलासया माग याःगु खः ।

राष्ट्रपति विद्यादेवी भण्डारीं वंगु पुस ५ गते प्रधानमन्त्री केपी शर्माया सिफारिस कथं संसद विघटन याःगु खःसा उकिया विरुद्ध झिंप्यम्हेस्यां मुद्दा दर्ता याःगु खः । थ्वहे झ्वलय् संवैधानिक इजलासय् तये हःम्ह न्हूम्ह न्यायाधीश सपना मल्ल प्रधानया बारे नं न्ह्यसः पिहां वःगु दु। वय्कः एमालेया पुलांम्ह सांसद खः । न्यायाधीश हरिकृष्ण कार्कीं त्वःतूगुलिं वय्कःयात तये हःगु खः ।

सम्बन्धित बुखँ

LEAVE YOUR COMMENTS