४० लाख जनसंख्या दुगु देय् क्रोसिया गुकथं फाइनलय् थ्यन

बिबिसी- क्रोसियां बुधवाः लुज्निकी रंगशालाय् इंग्ल्यान्डयात बुकूबलय् फुटबलय् न्हूगु इतिहास छगू च्वल । करिब ४१ लाख जनसंख्या दुगु क्रोसिया सन् १९५० य् उरुग्वे फाइनलय् थ्यनेधुंकाः न्हापांखुसी विश्वकपया फाइनलय् थ्यंगु दकलय् चिधंगु देय् जूगु दु । थुकियात अझ थुइक धायेगु खःसा मरिटानिया व कुवेतया ति जक हे जनसंख्या क्रोसियाया दु ।

सन् २०२२ य् कतारय् जुइगु विश्वकपया इलय् तक क्रोसियाया जनसंख्या झन म्हो जुइगु जुइ । छाय्धाःसा थुबलय् तक थनया यक्व हे ल्याय्म्हत थप समृद्ध जीवन मालेगु झ्वलय् क्रोसिया त्वःताः पश्चिमी देशय् वनेधुंकल जुइ ।

क्रोसियां रुसय् जारी विश्वकपय् तय याःगु यात्रां थपाय्सकं चिधकंगु देशं गुकथं उत्कृष्ट कासामि बुइकल धयागु बहस नं न्ह्यःने हःगु दु । यदि छिं थुकिया लिउने नुगः हे थुं दिइकथंया बाखंया अपेक्षा यानादियागु दुसा छि निराश जुइमाली ।

सन् १९९८ य् क्रोसियाया प्रथम राष्ट्रपति फ्रान्यो टुज्म्यानं कासामितय्त राष्ट्रया सर्वोत्तम राजदूत धकाः व्याख्या यायेधुंकाः हे जक खेलकूदय् राष्ट्रिय पहिचानया विषय जूगु खः । उबलय् क्रोसिसया अन्तिम प्यंगूगु थासय् थ्यंगु खः ।

प्रजातान्त्रिक अभ्यासया ताःहाकःगु यात्रा पार मयानिगु देय्या निंतिं विश्वकपया सेमिफाइनलय् थ्यनेगु धयागु नं चानचुनया खँ मखु । थ्व देय्या प्रवद्र्धनया निंतिं नं छगू बांलाःगु माध्यम खः । तर क्रोसियाया फुटबलया सफलता न्हापा हे सोचबिचा यानातःकथं वा व्यवस्थित प्रणालीया उपज धाःसा मखु । थ्व कासामितय् न्ह्यःने यक्व हे पंगःत वःसां चूलाःगु सफलताया उदाहरण खः ।

उदाहरणया निंतिं क्रोसियाया रंगशाला मध्ये न्यागू जक युएफएया अन्तर्राष्ट्रिय मापदण्ड कथं दु । संचरना तसकं दयनीय दु, क्वय्या तहया फुटबलय् लगानी शून्य धयाथें दु । क्रोसियाली फुटबल क्लबया खराब आर्थिक अवस्थाया कारणं यक्व उत्कृष्ट कासामि थःगु क्लब याकनं त्वःतेत बाध्य जुइ । उकिसनं क्रोसियाली फुटबलय् भ्रष्टाचार व्याप्त दु ।

छगू बराबरीया कासा, नकआउट चरणया कासाय् लिउने लायेधुंकाः नं पुनरागमन व विश्वस्तया कासामितय् उत्कृष्ट प्रदर्शनं धाथें ग्वाहालि यात । गोलकिपरं महत्वपूर्ण इलय् उत्कृष्ट बचाउ यात । तर यक्व मनूत धार्मिक दुगु क्रोसिया थेंज्याःगु देशं विश्वकपय् चूलाकूगु सफलतायात दैवी शक्तिलिसे स्वानाः स्वयेगु याः । गुलिसिनं क्रोसियालीत युरोपया दकलय् तःधिकःपिं जूगुलिं उमिगु सफलता वंशानुगत गुणलिसे स्वानाः स्वयाच्वंगु दु । तर झीसं क्रोसियालीत छुकि अब्बल दु धयागु ल्वःमंकेमजिउ । व कठिन अवस्थाय् दुसां लगे जुयाच्वनेगु । ल्याय्म्हत भीडभाडं जाःगु, ग्यानापुगु तालिम केन्द्रय् प्रशिक्षण कयाच्वंगु यक्व बाखं दु ।

आधारभूत सामग्री वं वयात वं वयात इना, थीथी प्रतियोगिताय् ब्वति कायेत थःगु खल्तीं हे खर्च तयाः, थःम्हं बालं कयागु भ्यानय् हे न्ह्यः मवयेक चा छ्याइगु बाखंत सुलाच्वंगु दु । तर दुर्भाग्य, थज्याःगु बाखंया पात्रतय्सं चूलाकूगु उपलब्धियात क्यनाः थःगु निष्क्रियतायात वैधता बीगु निकाय क्रोसियाय् दु ।

क्रोसियां विश्वकप ल्ह्वन धाःसा थ्व खेलकूद इतिहासय् अनौठो कथंया सफलतामध्ये छगू जुइ ।