ने. सं. ११४६ बछलागा पञ्चमी -

रुसं फिनल्यान्डयात बुकल

येँ – रुसं युरो कपय् न्हापांगु विजय चूलाकूगु दु । बुधवाः बहनी सेन्ट पिटर्सवर्गय् जूगु कासाय् रुसं फिनल्यान्डयात १–० गोलं बुकूगु खः । ३४ हजार घरेलु दर्शकयात लय्तायाकेगु झ्वलय् रुसया निंतिं अल मिरन्चुकं छगू जक गोल याःगु खः । न्हापांगु हाफया इन्जुरि इलय् डिज्युबाया पासय् मिरन्चुकं कासाया छगू जक गोल याःगु खः ।

थ्व गोल लिसें समूह बी इ रुसया ३ ल्याः जूगु दु । थुकिया लिसें रुसया निगूगु चरणय् वनीगु सम्भावना नं बांलाःगु दु । थ्वयां न्ह्यःया कासाय् रुस बेल्जियमपाखें ३–० गोलं बूगु खः । आः थ्व समूहय् फिनल्यान्ड, रुस, बेल्जियम स्वंगुलिं टिमया ३–३ अंक जूगु दुसा डेनमार्कया अंक मदुनि । बिहिवाः सनिलय् डेनमार्कं बेल्जियमलिसे म्हिती ।