ने. सं. ११४४ कौलाथ्व चौथी -

यलयात सांस्कृतिक व पर्यटकीय क्षेत्रय् विकास याइगु

येँ- यल महानगरपालिका वडा नं १६ यात सांस्कृतिक व पर्यटकीय क्षेत्रया रुपय् विकास याइगु जूगु दु । समग्र महानगर क्षेत्रयात हे उकथं विकास यायेगु लक्ष्ययात ध्यानय् तयाः वडां वइगु आर्थिक दँय् नियमित पूर्वाधार, पार्क निर्माण नापं संस्कृति संरक्षण व पर्यटन विकाया कार्य योजना न्ह्यःने हःगु दु ।

यल मनपा १६ वडाअध्यक्ष निर्मलरत्न शाक्यं वडा दुनेया थीथी टोल सुधार समिति, मिसा पुचः, थीथी संघसंस्थाया प्रतिनिधितय् सहभागिताय् छगू वडा भेला यासें वडायात सांस्कृतिक, पर्यटकीय क्षेत्रया रुपय् विकास यायेगु जानकारी बियादीगु खः । वडाअध्यक्ष शाक्यं वइगु आर्थिक दँया निंतिं प्रस्तावित योजना न्ह्यब्वयादिसें वडायात सांस्कृतिक व पर्यटकीय विकासया निंतिं नमूना वडाया रुपय् विकास यायेगु लक्ष्यसहितया योजना न्ह्यब्वयादीगु खः ।

साविकया १६ व १८ वडायात छगू यानाः वडा नं. १६ कायम यानातःगु वडाय् अप्वःथें मूर्त व अमूर्त संस्कृति संचालन जुइगु मुख्य थाय् खः । थुगु वडाय् विश्व सम्पदाया धलखय् दुथ्यानाच्वंगु यल लाय्कू लागा लिसें मेमेगु नं आपालं महत्वपूर्ण सम्पदा व संस्कृति दुथ्यानाच्वंगु दु । कला, संस्कृतिया विशेष क्षेत्र वा सांस्कृतिक वडाया रुपय् घोषणा यानाः व हे कथं कार्य योजना न्ह्यःने यंकेगु जुइ धासें वडाअध्यक्ष शाक्यं वडां हस्तकला व्यवसायीतय्त प्रवद्र्धन यायेगु उद्देश्यं हस्तकला, मेला, परम्परागत बाजं, जीवनशैली, संस्कार, नेपालभाषा, लिपिया संरक्षण व अध्ययन याइपिनिगु निंतिं नेवाः लघु सांस्कृतिक संग्रहाल स्थापना यायेगु योजना दुगु जानकारी बियादिल ।

अथे हे स्थानीय त्वाः, थाय्बाय् व बस्तीय ऐतिहासिक पृष्ठभूमिलिसे स्वा नाच्वंगुया संरक्षण यायेगु नापं पर्यटकतय्त जानकारी बीकथं नेपाल लिपि, देवनागरी व अंग्रेजीं बोर्ड तयेगु योजना नं वडां न्ह्यःने हःगु दु । वइगु आर्थिक दँय् वडाया विकासया निंतिं छगू करोड न्यय्गू लाख विनियोजन याःगु दु ।

उगु हे ज्याझ्वलय् प्रदेशसभा सदस्य शोभा शाक्यं यलया विकासया आधार धइगु हे सांस्कसतिक विकास व पर्यटक जूगुलिं वडां नं व हे कथंया योजना न्ह्यःने हःगु दु धासें आः उकियात कार्यान्वयन याना यंकेमाःगु खँय् बः बियादिल ।