हरेक मिनेट मांभाय्या बिचाः याइम्ह महाकवि जोशी

येँ – महाकवि गिरिजा प्रसाद जोशीया व्यक्तित्व व कृतित्वयात कयाः नेपाल प्रज्ञा प्रतिष्ठानं बिचाः गोष्ठी यात । महाकवि जोशीया ८३ क्वःगु बुन्हिया लसताय् लाकाः प्रतिष्ठानं ‘महाकवि गिरिजाप्रसाद जोशीको व्यक्तित्व र कृतित्वका विविध आयाम’ विषयय् बिचाः गोष्ठी याःगु खः ।

गोष्ठीइ साहित्यकार शरद कसाःनं ज्यापौ न्ह्यब्वयादिसें महाकवि जोशी नेपालभाषा उन्नतिया निंतिं हे जन्मे जूम्ह लेखक खः धयादिल । वय्कः थःगु मांभाय् सम्वद्र्धन व उन्नतिया निंतिं हरेक मिनेट हे चिन्तित व सचेत दुम्ह खः धासें वय्कलं न्ह्याम्ह हे मनू नापलाःसां मांभाय् त्वःते मजिउगु धकाः खँ ल्हानादी धकाः नं कनादिल ।

ज्यापती टिप्पणी यासें समालोचक पूर्ण ताम्राकारं महाकवि जोशी नेपालभाषां दकलय् अप्वः सफू च्वःम्ह व्यक्तित्व खः धयादिल । ४९ दँया म्हो उमेरय् हे मदुम्ह जोशीं थःगु स्वंगू दशकया साहित्यिक यात्राय् ७०गुलिं मल्याक सफू च्वयादीगु खँ वय्कलं धयादिल । वय्कः च्वयेत मूड मखु, प्रस्ताव वःसा गाः धयादीम्ह खः धासें ताम्राकारं धयादिल, ‘पासापिंसं वय्कः– यात महाकाव्य छगू च्वयेमाल धकाः प्रस्ताव तयादिल, दछि लिपा हे वय्कलं ‘ल्वहंमा’ च्वयाः लःल्हानादिल ।’

ज्याझ्वलय् न्ववानादिसें खस नेपाली भाय्या साहित्यकार नारायण ढकालं थम्हं महाकवि लिसे यक्व संगत यायेमखंसां वय्कः छम्ह च्वन्ह्याःम्ह प्रगतिवादी च्वमि खः व वय्कःया सफूत मेमेगु भासं नं अनुवाद यानाः सकलें नेपाःमितय्त कनेमाःगु बिचाः तयादिल ।
प्रतिष्ठानया उपकुलपति जगमान गुरुङया सभापतित्वय् जूगु ज्याझ्वलय् कुलपति गंगाप्रसाद उप्रेती मूपाहां कथं झाःगु खः । प्रतिष्ठानया मातृभाषा विभागया प्रमुख प्राज्ञ लक्ष्मी मालीया संयोजनय् जूगु ज्याझ्वलय् मूपाहां उप्रेतीं महाकवि जोशीया खण्डकाव्य ‘हेल्चा’या विमोचन नं यानादीगु खः ।

ज्याझ्वलय् किरण सायमिं महाकविया म्येँ न्यंकादीगु खःसा कविपिं कृष्णभक्त बोडे, नारद वज्राचार्य, रजनी मिला, रमेशकाजी स्थापित व सुरजवीर वज्राचार्यं महाकवि जोशीं च्वयादीगु कविता वाचन यानादीगु खः ।

थ्वहे ज्याझ्वलय् समाजसेवी राजदास श्रेष्ठं विराट साहित्य गुथिया छेँ दनेत महाकविया ८३ दँ बुन्हिया ल्याः कथं ८३ हजार तका दां ग्वाहालि लःल्हानादिल ।

सम्बन्धित बुखँ

LEAVE YOUR COMMENTS