धरहराया ल्यं दुगु ब्व न्हाय्कं दुने मतइगु

येँ (नेपालभाषा टाइम्स)÷२०७२ सालया तःभुखाचं दुंगु धरहराया ल्यं दनिगु ब्वयात आः न्हाय्कं तयाः त्वमपुइगु जूगु दु । थ्व स्वयां न्ह्यः धरहराया ल्यं दुगु ब्वयात न्हाय्कं दुने तयाः सुरक्षित यायेगु कथं डिजाइन यानातःगु खः ।

स्थानीयवासीं न्हाय्कं दुने धरहराया ल्यं दुगु ब्व तये मजिउगु, बरु उकियात खुल्ला रुपय् सुरक्षित यायेमाःगु माग यायेवं स्थानीयवासी लिसे सहमति यानाः आःया हे अवस्थाय् तयेगु खँ शहरी विकास तथा भवन निर्माण विभागं धाःगु दु ।

विभागया पुनर्निर्माण इकाई प्रमुख प्रभाकरलाल कर्णया कथं धरहराया ल्यं दनिगु ब्वयात आः प्रवलीकरण यानाः वयां लिपा ‘केमिकल ट्रिटमेन्ट’ यानाः स्थिर यायेगु ज्या याइ । पुरातात्विक

संरचना जूगुलिं विज्ञतय्सं न्हाय्कं दुने तयेगु खँयात समर्थन मयाःगु खःसा वयां लिपा विभागं ल्यं दुगु ब्वयात आः गथे दुगु खः अथे हे संरक्षण यायेगु योजना दयेकूगु खः । ल्यं दुगु ब्वयात अथें तयाः अन न्हूगु धरहरा दयेकेधुंकूगु दु ।