तायमचा प्याखं कासा क्वचाल
येँ(नेपालभाषा टाइम्स)÷पोखराय् जूगु तायमचा प्याखं कासाय् समाज कल्याण नेवाः खलः, पोखरा ३२ राजाको चौतारी न्हाप लाःगु दु । वंगु शनिवाः जूगु कासाय् शिशुवा नेवाः खलः पोखरा–३० लिउ व रुप देउराली नेवाः खलः लियांलिउ लाःगु दुसा मिलिजुली नेवाः खलः–३३ बागमारां हःपाः सिरपाः त्याकेत ताःलाःगु दु ।
लेखनाथ नेवाः खलःया आह्वानय् गगन नेवाः खलःया ग्वसालय् जूगु ताय्मचा प्याखं कासाय् न्हापयात पीद्वः, लिउयात स्वीद्वः, लियांलिउयात नीद्वः व हःपाःया झिद्वः तका दांलिसें दसिपौ लःल्हाःगु खः ।
भिमसेन नेवाः खलः पोखराया स्मारिक श्रेष्ठ उत्कृष्ट परि नृत्य न्ह्यब्वयादीम्ह कासामि जुइत ताःलाःगु दुसा समाज कल्याण नेवाः खलः, पोखरा– ३२ राजाको चौतारीं उत्कृष्ट भेषभूषया सिरपाः त्याकेत ताःलाःगु दु ।
ग्वसाः खलः गगन नेवाः खलःया नायः लिलबहादुर श्रेष्ठंं ऐतिहासिक तायमचा प्याखंया सांस्कृतिक महत्वययात ध्यानय् तयाः नापं प्याखंया संरक्षण व न्हू पुस्तायात हस्तान्तरण यायेगु ल्याखं कासाया ग्वसाः ग्वयागु जानकारी बियादिल ।
कासाया उलेज्या पोखरा महानगरपालिकाया प्रमुख धनराज आचार्यं यानादीगु खः । ज्याझ्वलय् नवासें वय्कलं प्राचीन व मौलिक संस्कार, कला, संस्कृति संरक्षण यानाः उकिया प्रवद्र्धन यायेमाःगु नापं पुस्तान्तरण याना वनेमाःगु खँय् बः बियादीगु खः ।
ज्याझ्वलय् नेवाः खलः कास्कीया नायः अशोक पालिखे, पोखरा महानगरपालिका ३२ वडाअध्यक्ष अक्कलबहादुर कार्की, गगन नेवाः खलःया छ्याञ्जे शरणकुमार प्रधान लगायतं नुगःखँ तयादीगु खः । कासाय् गुंगू पुचलं ब्वति काःगु खः ।
LEAVE YOUR COMMENTS