भैरहवां चितवनयात खुगू विकेटं बुकल

येँ – एभरेष्ट प्रिमियर लिगय् भैरहवा ग्लाडियर्टसं चितवन टाइगर्सयात खुगू विकेटं बुकूगु दु । लिगय् चितवनया थ्व न्हापांगु पराजय खः । कासाय् पराजित जूसां चितवन लिगया शीर्ष थासय् दु ।
कासाय् टस त्याका न्हापां ब्याटिङ याःगु चितवनं निर्धारित २० ओभरय् ८ विकेटया क्षतिइ १६५ रन दयेकूगु खः । चितवनया निंतिं करिम जनं ३५ रन, मोहम्मद सहजादं ३२ रन व सिकुगे प्रसन्नं २४ रन, भिम सार्कीं १६, राजेश पुलामीं १४, दिलिप नाथं १३, कमलसिंह ऐरीं अविजित ७ रन व देव खनालं ५ रन दयेकूगु खः । भैरहवाया अविनाश बोहरां स्वंगू विकेट काःगु खःसा कुशल मल्लं निगू विकेट, कृष्ण कार्की, दुर्गेश गुप्ता व धम्मिका प्रसादं छगू छगू विकेट काल ।

कासाय् चितवनं बिउगु १६५ रनया लक्ष्य भैरहवां १७.५ ओभरय् प्यंगू विकेटया क्षतिइ पुवंकूगु खः । भैरहवाया निंतिं प्रदीप ऐरीं ७२ रन, तमिम इकबालं ४० रन व उपुल थंरगां अविजित ३९ रन दयेकूगु खः । चितवनया निंतिं करिम जनतं निगू विकेट काःगु खःसा सागर ढकाल व भिम सार्कीं छगू छगू विकेट काल ।

चितवन व भैरहवा निंगुलिं टिमं प्लेअफय् थाय् दयेकेधुकल ।