सरकार–डा. केसी झन तनाव

डा. केसीं धाः थे कानून
दयेके फइ मखु ः शिक्षा मन्त्री

येँ – चिकित्सा शिक्षा विधेयकया खँय् डा. गोविन्द केसी व सरकार दथुइ जुयाच्वंगु विवाद समाधान जुइगु सिबें अझ हे तच्वया वनीगु संकेत पिहां वःगु दु । म्हिगः राष्ट्रिय सभाय् थुकिया बारे पिहां वःगु विशेष महत्वया प्रस्तावयात लिसः बिसें शिक्षामन्त्री गिरिराजमणि पोखरेलं डा. केसीं धाः थे यानाः चिकित्सा शिक्षा विधेयक हये फइ मखु धयादीगु दु ।

यदि डा. केसीं धाः थे हे विधेयक हयेगु खःसा थुकिं सार्वभौम संसदया अधिकार हनन जुइगु सम्भावना दुगुलिं वय्कलं धाः थे विधेयक महयेगु खँ वय्कलं स्पष्ट यानादिल । शिक्षा मन्त्री पोखरेलं माथेमा आयोगया प्रतिवेदन छगू विशिष्ट इलय् वःगु जुयाः उकियात आः वयाः हुबहु लागू याके मफइगु खँ नं स्पष्ट यानादिल ।

थः न्हापा शिक्षा मन्त्री जुयागु इलय् हे उगु प्रतिवेदनयात कानुनी रुप बीत स्वयागु खःसां अबले मफुगु व आः ला झन् स्थिति हे परिवर्तन जुइधुंकूगु कारणं उकियात लागू याके मफइगु खँ नं वय्कलं कनादिल । थ्व स्वयां न्ह्यः प्रधानमन्त्री केपी ओलीयात नापलाः वंपिं चिकित्सक संघया पदाधिकारीपिंत नं प्रम ओलीं डा. केसीया मागयात पूवंके फइ मखु धकाः तप्यंक लिसः बियादीगु खः ।

डा. केसीया माग पूरा मयाःसा
हानं डाक्टर हडताल

थौंकन्हय् जुम्लाय् अनसन च्वनाच्वंम्ह डा. गोविन्द केसीया माग पूवंके फइ मखु धकाः प्रधानमन्त्री व शिक्षा मन्त्रीं तप्यंक धायेधुंकूगु दुसा मेखे नेपाल चिकित्सक संघं यदि डा. केसीया मागयात सरकारं तुरुन्त सम्बोधन मयात धाःसा थःपिंसं हानं हडताल याये माली धकाः ख्याच्वः बिउगु दु ।

यदि डा. केसीया माग सम्बोधन मयात धाःसा देय्न्यंकंया स्वास्थ्य सेवा ठप्प याये मालीगु ख्याच्वः संघं बिउगु खः । संघया अध्यक्ष डा. मुक्तिराम श्रेष्ठं छगू वक्तव्य जारी यासें डा. केसीया माग पूरा मजुल धाःसा देय्न्यंकं इमर्जेन्सी छगू बाहेक मेगु फुक्क हे सेवा ठप्प यायेगु ख्याच्वः बियादीगु खः ।

वय्कलं डा. केसीं ल्ह्वनाच्वंगु थीथी माग मध्ये स्वास्थ्य सेवालिसे सम्बन्धित मागय् जक थःपिनिगु सरोकार दु धासें मेमेगु मागया बारे थःपिनिगु छुं धायेगु मदु धकाः नं धयादीगु दु ।

संघं डा. केसीया चिकित्सा सम्बन्धी माग पूवंकेगु लागिं छगू समिति गठन यानाः न्ह्याः वनेत प्रधानमन्त्रीयात सुझाव बियागु खँ न्ह्यथँसें वय्कःया मागयात राजनीतिक मिखां स्वये मजिउगु खँ नं धयादीगु दु । प्रधानमन्त्री केपी ओलीं थज्याःगु माग ज्वना वयेगु खःसा डा. केसीं नं आन्दोलन त्वःताः पार्टीया टिकट कयाः वा धकाः हाथ्या बियादीगु खः ।