यलया कोत भवन पुनःनिर्माण अलपत्रय्

यल – स्वदँ न्ह्यःया तःभुखाचं जीर्ण अवस्थाय् थ्यंगु थनया कोत भवन पुनःनिर्माण अलपत्रय् लाःगु दु । यल लाय्कू लागाय् लाःगु कोत भवन भुखाय् ब्वःगु स्वदँ दयेधुंकाः नं आतकं पुनःनिर्माण प्रक्रिया न्ह्याये मफयेवं अलपत्र अवस्थाय् थ्यंगु खः ।

पाटन स्मारक संरक्षण तथा दरवार हेरचाह ज्याकूया प्रमुख काजीमान प्याकुरेलं धयादिल, ‘भुखाय् ब्वःगु स्वदँ दयेधुंकल, आतक नं पुनःनिर्माणया प्रक्रिया न्ह्याये फुगु मदुनि । भुखाचं जीर्ण अवस्थाय् थ्यंगु कोत भवन दकलय् न्हापां नेपाःया निंतिं भारतीय दूतावासं दयेकेगु निंतिं चिउताः नं क्यंगु खः । उकिया निंतिं दूतावासं सम्झौता नं याःगु खः ।

अबलय् भारतीय दूतावासं यल लाय्कू लागाया थीथी सम्पदा व स्मारकस्थल नापं कोत भवन नं पुनःनिर्माण यायेगु बारे नेपाल सरकारलिसें छगू सम्झौता याःगु खः । तर सम्झौता जूसां पुनःनिर्माण प्रक्रिया धाःसा न्ह्याः वने फुगु मदु । ‘कोत भवन भारतीय दूतावासं पुनःनिर्माण यायेत चिउताः क्यंगुलिं मेमेगु निकायं थुखेपाखे चिउताः क्यनाच्वंगु मदु ।

दूतावासं सम्झौता याःगु खःसां ज्या धाःसा आतक नं न्ह्याकेगुपाखें चिउताः क्यनाच्वंगु मदु’ वय्कलं धयादिल । सम्पदा संरक्षणया निंतिं स्थानीयवासीयाके जागरण वयेवं पुनःनिर्माणया भाला यल महानगरपालिकां कायेमाःगु स्थानीय्तय् धापू दु । उखे यल मनपां धाःसा पुनःनिर्माणय् सहकार्य यायेत यल उद्योग वाणिज्य संघयात इनाप यानागु व थ्व सम्बन्धय् सहलह जुयाच्वंगु धाःगु दु ।

सम्बन्धित बुखँ

LEAVE YOUR COMMENTS