ने. सं. ११४४ कौलाथ्व पारू - नःलास्वनेगु

अनलाइन शेयर कारोवार डाटा सेन्टर नेप्से भवनय् तयेगु सहमति

येँ- अनलाइन शेयर कारोवारया निंतिं तयेमाःगु डाटा सेन्टर नेपाल स्टक एक्स्चेञ्ज (नेप्से) भवनय् हे तइगु जूगु दु । थ्वयां न्ह्यव थ्व डाटा सेन्टर गन तयेगु धयागु बारे विवाद जुयाच्वंगु खः । नेप्से, ब्रोकर एशोसियसन व भन्डर कम्पनी वाइकोया प्रतिनिधितय् दथुइ सहलह लिपा नेप्से भवनय् हे डाटा सेन्टर तयेगु क्वःछिउगु खः ।
भेन्डर कम्पनी व ब्रोकर एशोसियसन जानाः डाटा सेन्टर तयेमाःगु खः ।

आः शेयर कारोवारया डाटा सुरक्षा विषययात ध्यानय् तयाः नेप्सेय् हे डाटा सेन्टर तयेगु क्वःछिउगु खँ धाःगु दु ।डाटा सेन्टर तयेमाःपिं ब्रोकर एशोसियसन व भेन्डर कम्पनीं थ्व हे विवादया कारणं डाटा सेन्टर तयेत लिबाकाच्वंगुलिं मक टे«डिङ न्ह्याकेत हे लिबानाच्वंगु दु । नेप्सें थौंकन्हय् अल्पकालीन डाटा सेन्टर तयार यानाः ज्या न्ह्याकाच्वंगु दु ।

आः डाटा सेन्टर तयेमाःगु सरोकारवाला निगुलिं कम्पनीं याकनं ज्या क्वचायेकेगु प्रतिबद्धता प्वंकूगु खँ नेप्सेया प्रमुख कार्यकारी अधिकृत चन्द्र साउदं कनादीगु दु । आः क्वःछिनातःगु ई दुने नं डाटा सेन्टर तयार मयात धाःसा नेप्सें थःपिंसं तयातःगु अल्पकालिन डाटा सेन्टर तयाः हे पूर्ण स्वचालित अनलाइन कारोवार सुरु यायेगु खँ नं साउदं कनादीगु दु ।

वय्कःया कथं न्ह्ूगु अनलाइन सफ्टवेयरया युजर एसेप्टेन्स टेस्टिङ (युएटी) क्वचायेवं पूर्ण रुपं स्वचालित अनलाइन कारोवार प्रणाली कार्यान्वनय् वइ । थ्व सफ्टवेयर परीक्षण यानाच्वंगु एकेएच इन्फरमेसन टेक्नोलोजीलिसे वइगु कात्तिकया अन्त वाःया दुने परीक्षण क्वचायेकेमाःगु सम्झौता जुयाच्वंगु दु ।

सम्झौता कथं ज्या जुल धाःसा याकनं हे पूर्ण स्वचालित अनलाईन कारोवार सुरु जुइगु खँ धाःगु दु । थौंकन्हय् नेप्सें अनलाइन प्रणाली चले यानाच्वंसां थुकिं खरिद विक्री आदेश जक बीफइ, पूवंक हिसाब राफसाफ यायेमजिउनि ।