चालु दँय् १०० मेगावाट मत थपे जुल

येँ – चालु आर्थिक दँय् नेपाल विद्युत प्राधिकरणया केन्द्रीय प्रशारण लाइनय् १ सय मेगावाट मत थप जूगु दु । वंगु साउन थुखे झिंखुगू आयोजना क्वचायेकाः १ सय मेगावाट मत थप जूगु खः । थुकी मध्ये निजी क्षेत्रया झिंन्यागू आयोजना सम्पन्न जुयाः ७० मेगावाट मत थप जूगु खःसा विद्युत प्राधिकरणं दयेकाच्वंगु चमेलिया आयोजना सम्पन्न जुयाः ३० मेगावाट मत उत्पादन जूगु खः ।

थुगु दँय् जलविद्युतया जडित क्षमता १ हजार १ सय मेगावाट थ्यनीगु खँ धाःगु दु । थ्व तापीय ऊर्जा बाहेकया खः । नेपालय् ५३ मेगावाट तापीय ऊर्जा उत्पादन जुयाच्वंगु दुसा ६ सय किलोवाट सोलर आयोजनां मत उत्पादन जुयाच्वंगु दु ।वंगु दँय् थीथी झिंनिगू आयोजना क्वचायाः केन्द्रीय प्रणालीइ १२२ मेगावट मत थप जूगु खः ।

नेपाल विद्युत प्राधिकरणं थुगुसी २५० मेगावाट मत थप जुइगु अनुमान याःगु खः । चालु आवय् निजी क्षेत्रपाखें २०५ मेगावाट व प्राधिकरणं ४५ मेगावाट मत उत्पादन यायेगु लक्ष्य तयातःगु खः । ताः ई लिपा प्रणालीइ माग स्वयां अप्वः मत आपूर्ति जुयाच्वंगु दु । प्रणालीइ थौंकन्हय् १०० मेगावाट मत अप्वयाच्वंगु दु । थौंकन्हय् मतया माग ११७५ निसें १२०० मेगावाट दुसा प्रणालीइ १३०० मेगावाट आपूर्ति जुयाच्वंगु दु ।