ने. सं. ११४३ तछलाथ्व दशमी -

येँया आपालं वडाय् कांग्रेस त्याना वल

येँ -येँ मनपाय् स्वंगूगु थासय् लानाच्वंम्ह कांग्रेसया मेयर उम्मेदवार सिर्जना सिंहं निगूगु थासय् लानाच्वंम्ह एमालेया उम्मेदवार केशव स्थापितयात लिफ्याःगु दु । दकलय् न्ह्यःने लानाच्वंम्ह स्वतन्त्र उम्मेदवार बालेन्द्र साह धाःसा अझं न्ह्यःने लानाच्वंगु दु । आइतवाः सनिल तकया ल्याः कथं साहं ४१ हजार २७९ मत काःगु दुसा सिंहं २३ हजार ८५५ व स्थापितं २३ हजार २४ मत काःगु दु ।

उकथं हे उपमयेरय् एमालेया सुनिता डंगोल ४० हजार स्वयां अप्वः मत कयाः थःगु विजय सुनिश्चित यानादीधुंकूगु दु । नेकपा (एस) या रामेश्वर श्रेष्ठं १३ हजार ४३१ मत काःगु दु ।

यलय् कांग्रेसया चिरिबाबु महर्जन ३० हजार ८६० मत हयाः न्ह्यःने लानाच्वंगु दुसा एमालेया हरिकृष्ण व्यञ्जनकार १८ हजार २०१ मत हयाः लिउने लानाच्वंगु दु । उकथं हे उपमेयरय् एमालेया मञ्जरी शाक्य १७ हजार ७१६ मत हयाः न्हयःने लानाच्वंगु दुसा माओवादीया बाबुराजा वज्राचार्य १२ हजार ६६६ मत हयाः लिउने लानाच्वंगु दु ।

येँय् स्वतन्त्र उम्मेदवार सुमन साय्मिं ४२५५ भोट कायेधुंकूगु दुसा नेपाः पार्टीया विजय सैंजुं ३० मत काःगु दु ।

येँ महानगरपालिकाया थीथी वडाय् न्हापा एमाले त्यानाच्वंथाय् थुगुसी कांग्रेसं त्याकूगु दु । २७ वडाय् एमालेया चिनियाँ वज्राचार्ययात बुकाः योगेशकुमार खड्गी त्याःगु दुसा २४ वडाय् एमालेया सुजनविलास वज्राचार्ययात बुकाः विनोदकुमार राजभण्डारी त्याःगु दु । अथे हे न्हापा एमाले त्यानाच्वंगु वडा १२ य् नं विकास डंगोल बुइगु निश्चित जूगु दु । २५ वडाय् कांग्रेसया राजेश डंगोल त्याःगु दु । अथेहे ११ वडाय् हिरालाल तण्डुकार त्यायेधुंकूगु दु । आःतक वःगु लिच्वः कथं एमालें न्हय्गू वडा त्याकूगु दुसा काग्रेसं झिंछगू वडा त्याकेधुंकूगु दु ।