राष्ट्रपतिया खँय् दाहालयात ओलीपाखें अझ दबाब
येँ(नेपालभाषा टाइम्स)÷फागुन २५ गते जुइगु राष्ट्रपति चुनावय् एमालेया उम्मेदवारयात समर्थन यायेमाः धकाः प्रधानमन्त्री लिसें माओवादी केन्द्रया अध्यक्ष पुष्पकमल दाहालयात एमाले अध्यक्ष केपी ओलीं दबाब अप्वयेका यंकूगु दु ।
एमालें थम्हं राष्ट्रपतिया उम्मेदवारयात हे त्याकेमाः धकाः अध्यक्ष ओलीं तःक्वःमछि धयां नं दाहाल तयार मजूगु खनाः म्हिगः राप्रपा व रास्वपाया अध्यक्षपिंत नं नापं यंकाः दबाब बीकूगु खँ सीदुगु दु ।
म्हिगः वालुवाटारय् च्वंगु उच्चस्तरीय राजनीतिक संयन्त्रया बैठकय् एमाले अध्यक्ष ओली जक मखु राप्रपा अध्यक्ष राजेन्द्र लिङदेन व रास्वपाया सभापति रवि लामिछानें समेत राष्ट्रपतिया सवालय् न्हापा हे जूगु सहमति स्वयां पिहां वने जी मखु धकाः दबाब बीगु ज्या याःगु खः ।
प्रधानमन्त्री दाहालं धाःसा राष्ट्रपतिया चुनावय् थःत विश्वासया मत बिउपिं सकलें राजनीतिक पार्टीया बिचाःयात समेत कःघानाः उम्मेदवार थने माली धइगु बिचाः न्ह्यःने तयादीगु दु ।
राष्ट्रपति चुनावया थ्व विवादं यानाः वर्तमान सत्ता गठबन्धन त्वाःदलीगु खः ला धइगु संकेत समेत पिहां वयेधुंकूगु दु । उकिया न्हापांगु संकेत कथं रास्वपायात गृह मन्त्री बी मखु धकाः प्रम दाहालं काःगु अडानं यानाः रास्वपा सरकारं पिहां वयेधुंकूगु दु ।
अथे हे सुदूरपश्चिम प्रदेशय् सत्ता गठबन्धनया हे छगू पार्टी एमालेया नेतृत्वय् गठन जुइधुंकूगु सरकारयात गठबन्धनया हे मेगु घटक नागरिक उन्मुक्ति पार्टीं मत बिउगु कारणं विघटन याये माःगु अवस्था पिहां वःगु दुसा आः अन नेपाली कांग्रेसं सरकार गठन याःगु दु । प्रदेशय् ब्वलंगु थज्याःगु विवाद विस्तार जुया वन धाःसा केन्द्रय् तकं हे समस्या पिहां वये फइगु खँ धयाहःगु दु ।
प्रधानमन्त्री दाहालं एमालेया उम्मेदवारयात समर्थन यायेगु खँ आः नं धयाच्वंगु मदुनिसा वय्कलं राष्ट्रिय सहमतिया आधारय् सकसितं मान्य जुइम्ह मनूयात राष्ट्रपति दयेकेमाः धायेगु यानाच्वंगु दु । एमालें राष्ट्रपति पदय् थः उम्मेदवार थ्व खः धकाः धाःगु मदुनि ।
LEAVE YOUR COMMENTS