येँया जग्गा भावय् न्हूगु वर्गीकरण

येँ – येँ महानगरपालिकां १३ अर्ब २ करोड १२ लाख तकाया बजेट न्ह्यब्वःगु दु । येँमनपाया उपप्रमुख हरिप्रभा खड्गीं उगु बजेट प्रस्तुत यानादीगु खः । वइगु आर्थिक दँया आन्तरिक आयपाखें ४ अर्ब ९० करोड, बाह्य स्रोतं ५ अर्ब १९ करोड व मेगु स्रोतं १ अर्ब ४ करोड ११ लाख तका बजेट प्रस्तुत याःगु खः । थ्व बाहेक येँमनपां केन्द्र सरकारपाखें १ अर्ब ७८ करोड अनुदान वइगु खँ धाःगु दु । येँ मनपां मोनोरेलंनिसें ई–ट्वाइलेट दयेकेगु तकया योजना पित हःगु दु । उकिया निंतिं १५ करोड तकाया बजेट फ्याःगु दु । अथेहे सहरी सुविधा न्युनतम शर्त, सुरक्षित भवन व नक्सापास डिजिटल यायेगु उपकरण न्यायेगु निंतिं ७ करोड ८१ लाख तका विनियोजन याःगु दु । अथेहे पशु वधशाला व थौंकन्हय् न्ह्यानाच्वंगु तरकारी बजार आधुनिकीकरणया निंतिं ६ करोड १८ लाख तकाया बजेट विनियोजन याःगु दु । शिक्षाय् १ अर्ब १० करोड तका दां विनियोजन याःगु दु ।
येँमनपाया थुगुसीया बजेटय् जग्गाया मूल्यांकन नं सार्वजनिक याःगु दु । वइगु आर्थिक दँया बजेट सार्वजनिक यायेगु झ्वलय् न्हूगु मूल्यांकन सार्वजनिक याःगु खः । न्हूगु मूल्यांकन कथं येँमनपा दुनेया जग्गा ७६ किसिमं वर्गीकरण याःगु दु । थुकी दकलय् अप्वः दरवारमार्ग केशर महल जुयाः पश्चिम क्षेत्रपाटी तकया जग्गा प्रतिआना ६० लाख तका कायम याःगु दु । उकथं हे येँया दुनेया भाग हनुमानध्वाखा, वंघः, असं, भोताहिति क्षेत्रय् नं उगु हे दर कायम याःगु दु । अथेहे माइतीघरंनिसें कृष्ण पाउरोटी, दरवारमार्ग, जमलय् नं प्रतिआना जग्गाया भाः ६० लाख हे कायम याःगु दु । पुतली सडक, बागबजार व रत्नपार्क मूलँय् प्रतिआना ४८ लाख तका कायम याःगु दु ।

सम्बन्धित बुखँ

LEAVE YOUR COMMENTS