उपत्यका विकास खारेज या ः मेयर श्रेष्ठ

येँ- मध्यपुर नगरपालिकाया प्रमुख मदनसुन्दर श्रेष्ठं येँ उपत्यका विकास प्राधिकरण खारेज यायेत माग यानादीगु दु । प्राधिकरणं स्थानीय सरकार, नेपाःया संविधान व वर्तमान ऐन नियम बर्खिलाप ज्या याःगु धासें शुक्रवाः छगू पत्रकार सम्मेलनय् वय्कलं थ्व माग यानादीगु खः । लिसें वय्कलं स्थानीय सरकारयात बाइपास यानाः न्ह्याः मवनेत नं प्राधिकरणयात ख्याच्वः बियादीगु दु ।

प्राधिकरणं मध्यपुर थिमिइ सञ्चालन जुयाच्वंगु जग्गा व्यवस्थापन समितिया अध्यक्षपाखें थिमि मनपाया प्रमुखयात चीकेगु निर्णय याःगुलिं वय्कलं प्राधिकरण हे खारेज यायेत माग यानादीगु खः ।

देय् संघीयताय् वनेधुंकूगु व वहे कथं स्थानीय व प्रदेश सरकार गठन जुयाः ज्या नापं जुइधुंकूगु अवस्थाय् छुं व्यक्तियात फाइदा जुइगु कथं प्राधिकरणं ज्या यानाच्वंगु द्वपं बियादिसें अज्याःगु ज्या थःपिंत स्वीकार्य मजूगु खँ नं वय्कलं कनादिल । वय्कलं धयादी, ‘प्राधिकरण छुं मनूतय् भ्रष्टाचार यायेगु अखडा जुयाच्वंगु दु ।’