ने. सं. ११४४ कौलाथ्व पारू - नःलास्वनेगु

महानगरय् ७२ प्रतिशत छेँबाः सम्बन्धी मुद्दा

येँ (नेपालभाषा टाइम्स)- येँ महानगरपालिकाया न्यायिक समितिइ वइगु ७२ प्रतिशत उजुरी व मुद्दा छेँबाःलिसे सम्बन्धित खनेदु । मंगलवाः न्यायलय पहुँच सम्बन्धी छगू ज्याझ्वःयात सम्बोधन यायेगु झ्वलय् येँमनपाया उपमेयर सुनिता डंगोलं उगु खँ धयादीगु खः ।

संघीयता लिपा अल्पसंख्यक व सीमान्तकृतया निंतिं न्यायय् पहुँच सम्बन्धी ज्याझ्वलय् न्ववासें वय्कलं थौंकन्हय् न्यायिक समितिइ अप्वः मुद्दा लाःगु धासें उकी दकलय् अप्वः छेँ बाः सम्बन्धित जूगु खँ धयादीगु खः ।

उकथं हे वय्कलं झिंन्यागू प्रतिशत मुद्दा साँध संधियारया उजुरी दुगु खँ नं धयादीगु दु । अज्याःगु मुद्दाय् सुनां जग्गा मिचे यात, सुनां पखाः आदि मिचे यात धइगु विषयय् उजुरी लाइगु जुयाच्वंगु दु ।

उपमेयर डंगोलया कथं न्यायिक समितिइ लाइगु उजुरी मध्ये ३ प्रतिशत जेष्ठ नागरिक सम्बन्धय् दुगु खँ नं धयादिल । थज्याःगु मुद्दाय् काय् भौ नं हेला यात, नके पुंके मबिल, अपमान याःगु, छेँय् नं पितिउँगु थेंज्याःगु मुद्दा जूगु खँ वय्कलं कनादिल । मेगु झिगू प्रतिशत धाःसा थीथी प्रकृतिया मुद्दा जुइगु याः ।

येँ महानगरया न्यायिक समितिं फयांफछि सहलह यानाः मेलमिलाप याकेगु कुतः यानागु धासें तर गुलिखे ल्वापुइ ‘इगो’ या कारण थः क्वय् लाकेत मयःपिनिगु कारणं मेलमिलाप जुइ मफुगु खँ नं कनादीगु दु । उकथं हे वय्कलं लिपांगु इलय् साइबर अपराध व ब्ल्याकमेलिङ थेंज्याःगु उजुरी ज्वनाः मिसापिं थःगु समितिइ वयेगु यानाच्वंगु धासें धयादिल, ‘मिसा उपमेयर जुयाः खः कि छाय् खः, मिसापिं आः साइबर भ्वाइलेन्स, ब्ल्याकमेलिङ आदिपाखे पीडित जूगु धासें न्यायिक समितिइ वयेगु यानाच्वंगु दु, तर न्यायिक समितिं अज्याःगु विषय मस्वइगु जूगुलिं जिमिसं साइबर ब्यूरोय् छ्वयेगु यानाच्वना ।’