ने. सं. ११४४ कौलाथ्व षष्ठी -

अप्वः चले जूगु फिल्म

बलिउडय् थौंकन्हय् फिल्म हिट वा फ्लपया दापु धइगु ‘हण्ड्रेड करोड क्लब’ जुयावःगु दु । अथे धयागु छुं नं फिल्मं १०० करोडसिबें अप्वः दां कमे याः कि मयाः धइगु हे हिट व फ्लपया दापु जुयाच्वंगु दु । न्हापा न्हापा जूसा फिल्म गुलि अप्वः न्हि तक चले जुल धयागु हिट वा फ्लपया दापु जुइगु खः । न्हापा बलिउडया दकलय् न्हापांम्ह सुपरस्टार राजेश खन्नाया झिंन्यागू फिल्म लगातार २५ वाःसिबें अप्वः चले जूगु खःसा आः वयाः सलमान खानया फिल्मं लगातार १०० करोडया ताँ पुलेत ताःलानाच्वंगु दु ।

२०१७ सालय् रिलिज जूगु सलमान खानया निगू फिल्म “ट्युबलाइट” व “टाइगर जिन्दा है” मध्ये “टाइगर जिन्दा है” पाखें ला आःतकया दुने ३०० करोडसिबें अप्वः दां कमे याये धुंकूगु दुसा वयागु फ्लप फिल्म धकाः धाःगु “ट्युबलाइटं” तकं १०० करोडसिबें अप्वः दां कमे याःगु खः । थुकथं सलमान खानयात आः वयाः राजेश खन्नाया रेकर्डयात हाथ्या बीफुम्ह हिरोया रुपय् कयाहःगु दु । न्हापा बलिउडय् २५ वाः तक चले जुलकि सिल्भर जुब्ली धकाः धाइसा ५० वाः तक चले जुलकी गोल्डेन जुब्ली धाइ । ७५ वाःयात प्लाटिनम जुब्ली व १०० वाःयात डाइमण्ड जुब्ली धाइगु खः । अले आपाः यानाः सिल्भर जुब्लीतक जूगु फिल्म दुसा वसिबें अप्वः चले जूगु फिल्म म्हो जक दु । बलिउडया इतिहासय् आःतकया दुने दकलय्–सकलय् चले जूगु फिल्म “दिलवाले दुलहनियाँ ले जाएंगे” खः।

१००९ वाः चले जूगु फिल्म “दिलवाले दुल्हनिंया ले जाएंगे”
शाहरूख खान व काजोलया मेनरोल दुगु थ्व फिल्मय् काजोलया अबु जुयाः म्हितूम्ह अमरीश पुरीं हिरो हिरोइनया मतिनाय् पंगः थनीम्ह पात्रया रुपय् नेगेटिभ रोल म्हितातःगु दु । यशराज फिल्म्सं दयेकूगु थ्व फिल्मया निर्माता यश चोपडा खःसा थुकिया निर्देशक आदित्य चोपडा खः । सन् १९९५ अक्टोबर २० तारीखनिसें निसें क्यनेज्या न्ह्याःगु थ्व फिल्म सन् २०१६ या अप्रिल महिनातक मुम्बईया मराठा मन्दिर नांयागु हलय् दिपाः मदयेक क्यंगु खः ।

थ्यंमथ्यं २०० वाः थ्यंगु न्हापांगु फिल्म “किस्मत”
सन् १९४३य् पिदंगु थ्व फिल्मया हिरो अशोक कुमार खः । निर्देशक ज्ञान मुखर्जी । १८७ वाःतक दिपाः मदयेक क्यनेज्या जूगु थ्व फिल्मय् मुमताज शान्ति, शाह नवाज नांयापिं कलाकारतय्सं नं म्हितातःगु दु । इहिपा न्ह्यः हे प्वाथय् दयेकूम्ह मिसाया बाखं न्ह्यब्वयातःगु थ्व फिल्मया बाखंयात उगु ईया निंतिं छगू हाथ्या कथं कयातःगु खःसा स्वकुमिं थ्व बाखंयात ययेकूबलय् फिल्म ताः ईतक चले जूगु खः । उलिजक मखसे छम्ह हे कलाकारं हिरो नं भिलेन नं जुयाः डबल रोल म्हितूगु नं थ्व हे न्हापांगु फिल्म जूगुलिं नं स्वकुमिया निंतिं उगु इलय् न्हूगु सवाः जूगु खः ।

“शोले”या रेकर्ड
भारतया फिल्मया इतिहासय् “शोले”यात छगू बिस्कं हे रेकर्ड तःगु फिल्मया रुपय् कयातःगु दु । आः तक थ्व फिल्मया रेकर्ड सुनां नं त्वाःथले मफुनि धाइ । थ्व मुक्कं २८६ वाःतक क्यंगु फिल्म खः, अले “दिलवाले दुल्हनिंया ले जाएंगे” १००९ वाः तक क्यंगु फिल्म खः । अय्सां “शोले”या रेकर्डयात “अनब्रेकेबल”या छाप लानाच्वंगुया कारण धइगु थ्व फिल्मं उगु इलय् कमे याःगु दां जक मखसे थुकिया डाइलग व म्ये नं आपालं लोकंह्वाःगुलिं खः । थ्व फिल्मया डाइलग थें मेगु छुं नं फिल्मया डाइलग उलि लोकंह्वाःगु आः तक नं मदुनि । अले थ्व फिल्मया लबःयात नं आः तक मेगु छुं फिल्मं ध्वयेफुगु मदुनि । सन् १९७५या अगस्ट १५ तारीखय् य् रिलिज जूगु इलय् दकलय् बीग बजेट फिल्मया रुपय् थुकिया बजेट स्वंगू करोड तका थ्यंगु खःसा थ्व फिल्मं लबः जक हे ३३ करोड निर्माताया धुकुतिइ दुतबिउगु खः । व ल्याखं थ्व फिल्मं झिदुगं अप्वः दां लबः बिउगु खः । थ्व फिल्मया निर्माता जि.पि. सिप्पी खःसा निर्देशक रमेश सिप्पी खः । “शोले” या सफलतां रमेश सिप्पीयात हिन्दी फिल्मया छम्ह दकलय् न्ह्यःने लाःम्ह निर्देशक दयेका बिल तर थ्व धुंकाः वं दयेकूगु हरेक फिल्मयात “शोले” लिसे दाना स्वइगुलिं यानाः स्वकुमियात धाःसा लिपा त्याके मफुत ।

“मुगल ए आजम”या छाप
के. आशिफ नांयाम्ह उगु ईया नांजाःम्ह फिल्ममेकरं दयेकूगु थ्व फिल्मय् पृथ्वीराज कपुर, दिलिप कुमार, मधुबाला, अजित, दुर्गा खोटे थेंज्याःपिं नांजाःपिं कलाकारतसें मेनरोल म्हितातःगु खः । थ्व फिल्मया शुटिंग क्वचायेकेत जक हे च्यादँ बित । ब्ल्याक एण्ड ह्वाइटय् फिल्म दयेकीगु जमानाय् शुटिंग शुरु जूगु थ्व फिल्मया शुटिंग क्वचाये न्ह्यःहे भारतय् कलर फिल्मया युग शुरु जूगु खः । थथे कलरया युग शुरु जूबलय् स्वकुमिया मिखा कलर फिल्मय् क्वसाना च्वंगुलिं स्वकुमिया सवाः थुइकाः छपु म्ये (जब प्यार किया तो डरना क्या) जक जूसां कलरय् शुटिंग याःगु खः । अले उगु म्ये शुटिंग यायेत छगू तःजिगु व थिकेगु सेट दयेकूगु खः । थ्व फिल्मया डाइलग नं साप हे लोकंह्वाःगु खःसा म्ये नं उत्तिकं हे लोकंह्वाःगु खः । थ्व फिल्मया संगीतकार नौशाद खः।

राज कपुरया “बरसात”
राज कपुरयात भारतया ग्रेटेस्ट शोमाय्नया रुपय् कयातःगु दु । राज कपुरं दयेकूगु आपालं फिल्मत हिट सुपर हिट जूगु दु । उकी मध्ये “बरसात” छगू अज्याःगु फिल्म खः, गुकिं १०० वाः पूवंकूगु खः । सन् १९२२ या अप्रिल २२ तारीख कुन्हु रिलिज जूगु थ्व फिल्म लगातार निदँ तक चले जूगु खः । थ्व फिल्मया निर्देशक नं राज कपुर हे खःसा थुकी राज कपुरया नापनापं नर्गिस, प्रेमनाथ व निम्मीया नं मेन रोल दु । बरसात में तुमसे मिले हम, हवा में उडता जाए मोरा लाल दुपत्ता मलमलका व जिया बेकरार है थेंज्याःगु आपालं लोकंह्वाःगु म्ये दुगु थ्व फिल्मयात राज कपुरया दकलय् सकलय् अप्वः चलेजूगु फिल्मया रुपय् कयातःगु दुसा राज कपुरयात दकलय् अप्वः दां लबः बिउगु फिल्म धाःसा “बबी”खः ।

प्लाटिनम् जुब्ली जूगु “मुकद्दर का सिकन्दर”
थ्व फिल्म अमिताभ बच्चन तसकं लोकंह्वानाच्वंगु इलय् पिहां वःगु खः । सन् १९७८ अक्टोबर २७ तारीख कुन्हु रिलिज जूगु थ्व फिल्म ७५वाः तक लगातार चले जूगु खःसा उगु ईया “शोले” व “बबी” धुंकाः दकलय् अप्वः दां कमे याःगु फिल्म खः । अमिताभ बच्चन, रेखा, विनोद खन्ना व अमजद खानया मेन रोल दुगु थ्व फिल्मया दक्व धइथें म्येँ नं लोकंह्वाःगु खः । थ्व फिल्मया निर्देशक प्रकाश मेहरा खःसा थ्वहे प्रकाश मेहराया “जंजीर” फिल्मं अमिताभ बच्चनयात छम्ह स्टारया रुपय् न्ह्यःने हःगु खः । अमिताभ व प्रकाश मेहराया पुचलं लिपा “लावारीस”, “नमक हलाल” थेंज्याःगु फिल्मय् नं नापं ज्या याःगु दु ।

सलमान खानया “मैने प्यार किया”
राजेश खन्ना , अमिताभ बच्चन व जितेन्द्र थेंज्याःपिं हिरोत बाज्यःवंबलय् स्वकुमिया नुगः साले मफया वनाच्वंगु इलय् ल्याय्म्ह हिरो सलमान खानया उदय जुल । खय्त ला आमिर खानया “कयामत से कयामत तक” पिहां वयाः हिट नं जुइ धुंकूगु खःसां सलमान खानया “मैने प्यार किया” थें अप्वः चले जूगु मेगु मदु । सन् १९८९ स पिहां वःगु थ्व फिल्म राजश्री फिल्मया लुखां पिहां वःगु खः । थ्व फिल्मय् सलमान खानलिसे भाग्यश्री हिरोइन जुया म्हितातःगु दु । थ्व फिल्मया हिरोनी भाग्यश्री बाज्यःवंम्ह जुयाः फिल्म म्हिताहःगु हे ताः दयेधुंकूसां सलमान खान ५२ दँया उमेरय् तकं हिरो हे जुयाः म्हिताच्वंगु दनि ।

सलमान खानया हे “हम आपके है कौन”
सलमान खानया हे सन् १९९४ अगस्ट ५ तारीखय् रिलिज जूगु फिल्म “हम आपके है कौन”यात बलिउडया फिल्म इतिहासय् २०० करोड कमे याःगु न्हापांगु फिल्मया रुपय् कयातःगु दु । “मैने प्यार किया” फिल्म दयेकूगु हे कम्पनी राजश्री प्रोडक्शन व व हे फिल्मया निर्देशक सुरज बडजात्यां दयेकूगु “हम आपके है कौन” फिल्म बलिउडय् दकलय् न्हापां १०० करोडया बनेज्या याःगु खःसा २०० करोड तका तक कमे याना रेकर्ड तःगु खः । अले ५० वाः पूवंकाः गोल्डेन जुब्ली माने याःगु खः ।

गोल्डेन जुब्ली माने याःगु मेगु छुं छुं फिल्म
आमिर खान व करिश्मा कपुरया सन् १९९६ नोभेम्बर १५ खुन्हु रिलिज जूगु “राजा हिन्दुस्तानी” नं ५० वाः पुवंकाः गोल्डेन जुब्ली माने याःगु फिल्म खः । थ्व फिल्मया निर्देशक धर्मेश दर्शन खः । अथे हे तुं निर्देशक राकेश रोशनं थः काय् ऋतिक रोशनयात बलिउडय् इण्ट्री याकेत दयेकूगु “कहो ना प्यार है” नं गोल्डेन जुब्ली माने याःगु फिल्म खः । अमिषा पटेल हिरोइन दुगु थ्व फिल्म सन् २००० जनवरी १४ तारीखय् रिलिज जूगु खः ।