सुरजया न्हिछि…

१२ गू संकिपानापं थ्यंमथ्यं ३० पुति म्युजिक भिडियो म्हितेधुंकूम्ह नांजाःम्ह कलाकालिसें नेपालभाषाया सुपरस्टारया दावेदार सुरज व्यञ्जनकार न्हियान्हिथं सुथसिया ५ः३० ताः इलय् दनेगु बानि दु । । दने धुंकाः निगू ग्लास क्वाःलः नियमित रुपं त्वनेगु यानादी सुरजं ।

अले ६ ताः ई दुने थःगु नित्यकर्म क्वचायेकाः सुरज धिम्बा डान्स एण्ड मोरया क्लासय् थ्यंकादीसा अन सुरजं नियमित डान्स क्लास ब्यवस्थापन व नृत्यगुरु सुरोज महर्जनपाखें नृत्य अभ्यास यायेगु यानादी । करिव ७ ताः इलय् सम्भव दत्तले म्वःल्हुइगु मखुसा ल्हाःतुति सिला ‘फ्रेश’ जुइगु बानि दु सुरजया ।

फ्रेस जुइधुंकाः गुंगू तगिमय् ब्वनाच्वंम्ह कायभाजुया होमवर्क चेक यायेगु व अनं लिपा थ्यंमथ्यं घौछिति मोबाइलय् दुगु तानपुराया आयप्स छ्यलाः रियाज यायेगु नापनापं प्यंगू, न्यागू कप लुमुलुमु धाःगु क्वाःलः त्वनेगु यानादी । न्हिछिया दुने छु छु यायेगु धकाः सुथय् हे मिले यायेगु बानि दुम्ह सुरजं थः काययात सुथय् ९ः०५ या दुने स्कुल थ्यंकेमाःगु जूगुलिं कायनाप हे दत्या न्ह्यवंनिसें शाकाहारी ज्यःनां यानादी ।

सुरजं अभिनय याःगु एतिहासिक व
सांस्कृतिकरुपं नांजाःगु ‘च्वापु फय्’ व ‘लाखे भाजु’ याकनं हे झीसं स्वये खनिगु जूगु दु ।

यल महानगरपालिका स्वास्थ्य कार्यान्वयन समिति वडा नं ९ या उपाध्यक्ष नं जुयादीम्ह वय्कः उगु समिति अन्तर्गत संचालन जुयाच्वंगु मातृशिशु क्लिनिक व टाइफाइड ज्वरो क्लिनिकय् न्हिं छक्वः नियमित रुपं दुहां वनाः निरीक्षण यायेगु यानादी । अनलिपा थःगु हे बिजिनेस फर्म लुमन्ति इन्टरप्राइजेजपाखें स्टेश्नरी सम्बन्धि अफिस सप्लाईया ज्याय् तक्यनादी ।

सुरज कलाकार जक मखु छम्ह आर.जे. नं वाःया प्रत्येक बुधवाः सुथसिया ११ ताः निसें ११.४५ ताः ईतक रेडियो सगरमाथा १०२.४ मेगाहर्जय् ज्याझ्वः न्ह्याकेगु ज्या नं याना वयाच्वंगु दु । सुरजं उगु ज्याझ्वलय् संगीत व कलाकारिता ख्यःया हनेबहपिंलिसे खँल्हाबल्हा यायेगु ज्याझ्वः न्ह्याकादी ।

अथे हे सुरजं ७ न्हु, १० न्हु व १५न्हुया ब्यागलं ब्यागलं प्याकेज दयेकाः उद्घोषण तालिम नं इलय्ब्यलय् बीगु यानावयाच्वंगु दु ।थुकथं थःगु न्हियान्हिथं यायेगु ज्याय् मेबलय् फुक्कं यथावत हे जुयाच्वनीसा फिल्म सुटिंगया ज्या व सांगीतिक ज्याझ्वः दइबलय् धाःसा सुरजया सुथंनिसें लिलाइ मखु ।

न्हिछिया थःगु माःगु सकतां ज्या यानाः करिब सनिलया ७ ताः इलय् छेँ थ्यंकेमाःम्ह सुरज छेँय् थ्यंनेवं ल्हाःतुति सिलाः कायया होमवर्कय् भचा ग्वहालिइ यायेगु बानि दु । अनंलि ८ निसें ९ ताः ईया दुने ब्यलि क्वचायेका करिब ११ः३० तक फेसबुक, युट्यूब व मेमेगु सामाजिक सञ्जाल अपडेट जुइगु नापं थःत यःगु न्हून्हूगु फिल्म स्वयेगु व हनेबहपिं संगीतकःमि पिनिगु म्येँ व संगीत न्यनाःलि द्यःनेगु यानादी ।

थुकथं थःगु न्हिछि ई छ्यानादीम्ह सुरजं थौंकन्हय् निगू न्हूगु नेवाः संकिपाःया धकिंबाखं (स्क्रिीट)च्वयेगु यानाच्वनादीगु दुसा ज्या, म्यँे च्वयेगु नापं थःत तसकं यःगु म्येँय लय् चिनेगु नापं छगू न्हूगु संकिपाया सुटिंगय् नं व्यस्त जुयाच्वंगु दु । सुरज अभिनय याःगु ऐतिहासिक व सांस्कृतिकरुपं नांजाःगु ‘च्वापु फय्’ व ‘लाखे भाजु’ याकनं हे पिदनेत्यंगु दु ।

न्ह्यब्वःम्ह ः नीलः साय्मि

सम्बन्धित बुखँ

LEAVE YOUR COMMENTS