खयेफु, बलात्कार जुल जुइ !

भारतीय फिल्म उद्योगलिसें टेलिभिजन श्रृंखलाय् छम्ह भिंम्ह अबुया भूमिकाय् खने दयाच्वनीम्ह तर चर्चाय् अपाय्सकं मवइम्ह अभिनेता खः आलोकनाथ । लिपांगु इलय् आलोकनाथ चर्चाय् वयाच्वंगु दु । उकिया कारण खः बलात्कार । मिसाम्ह निर्देशक विनिता नन्दां थौं स्वयां १९ दँ न्ह्यः आलोकनाथं थःत बलात्कार याःगु धइगु खँ सार्वजनिक यायेवं आलोकनाथ चर्चा व बदनामया चाकलय् लानाच्वंगु दुसा कानूनी कारवाहीया खतरा नं उतिकं अप्वयाच्वंगु दु ।

निर्देशक नन्दां आलोकनाथं बलात्कार याःगु धाःगु खँ सामाजिक संजालपाखें सार्वजनिक याःगु खःसा थ्व घटना तसकं चर्चाय् नं वयाच्वंगु दु ।
तर आलोकनाथं थःत बिउगु द्वपंयात खण्डन याःगु दु । छगू अन्तर्वार्ताय् आलोकनाथं धाःगु दु, ‘खयेफु व धाथें बलात्कारया शिकार जुल खइ, तर व जिं यानागु मखु, मेपिं सुनानं याःगु जुइमाः ।

उलि जक मखु, निर्देशक नन्दायात थौंया अवस्थाय् थ्यंकेगु निंतिं थम्हं आपालं ग्वाहालि यानागु दावी नं याःगु दु । ‘गुगुं इलय् विनिता नन्दा तसकं मिले जूम्ह पासा खः, जिं वयात थौंया अवस्थाय् तक थ्यंकेत ग्वाहालि यानागु खः’ आलोकनाथं अन्तर्वार्ताय् धाःगु दु ।