रथ दयेकाच्वंगुलिं जात्रा अनिश्चित

यल(नेपालभाषा टाइम्स)-थन न्ह्यानाच्वंगु बुंगद्यः जात्राया झ्वलय् बुंगद्यःया रथ स्यंगुलिं दयेकेगु ज्या न्ह्याकूगु दु । म्हिगःनिसें क्रेन हयाः द्यःया रथ दयेकेगु शुरु याःगु खः ।

गुथि संस्थानं रथ दयेकेगु ज्या जूगु कारणं आः बुंगद्यःया जात्रा छुं ई स्थगित जुइगु खँ धाःगु दु । क्रेन हयाः बांलाक हे रथ दयेकेमाःगु जुयाः आः द्यः गबले साली धइगु अनिश्चित जूगु खँ धाःगु दु । गुलिसिनं धाःसा निन्हु लिपा हे रथ दयेके सिधयेफुगु खँ नं धाःगु दु ।

बुंगद्यःया रथ उकुन्हु पूच्वं गाःबहाः याः न्यायेकेत साःबलय् हे तसकं धेचुलाः सालेत थाकुगु खः । उकिं रथयात तःथाय् जंगलः सालाः तिनि याः न्यायेकेत ताःलाःगु खः । बुंगद्यःया रथया घःचाःया च्वसं च्वंगु सिँयागु निनाः हे त्वःधुलाच्वंगु दु । थुकिं यानाः निनाः कुहां वयाः घःचाःयात समेत अवरोध याये फइगु खँ धाःगु दु । रथ यक्व धेचूगु जुयाः रथया घःचाः समेत छुं भचा थहां वनाः रथ क्वःदली थें च्वंगु खः । आः घःचाःया च्वय् च्वंगु निनाः दयेकाः जक रथ सालीगु खँ गुथि संस्थानं धाःगु दु ।