बुरांख्यलय् जेष्ठ नागरिक मनोरञ्जन सेवा केन्द्र

येँ – येँ महानगरपालिका १८ वडाया जनप्रतिनिधिपिंसं ज्येष्ठ नागरिक मनोरञ्जन सेवा केन्द्र चायेकुसें थःपिं स्थानिय निकायया चुनाव त्यानाः पदभार ग्रहण यानागु दछि क्यंगु लसता हंगु दु । ज्याथजिथिपिनि मनोरञ्जनया निंतिं १८ वडाय् लाःगु बुरांख्यलय् थुगु सेवा केन्द्र चायेकूगु खः । सेवा केन्द्र उलेज्याझ्वलय् वडाया हनेबहःपिंत थीथी सम्मान लःल्हायेगु लिसें ज्याथपिं नागरिकपिंत भत्ता नं इउँगु खः ।

ज्याझ्वलय् मूपाहां येँ महानगरपालिकाया मेयर विद्यासुन्दर शाक्यं सम्मानित व्यक्तिपिं येँ मनपा १८ वडाया पुलांम्ह वडाध्यक्ष चन्द्रानन्द नेवाःयात ताःई तक वडाध्यक्ष जुयाः समाजसेवा यानादीगु, वरिष्ठ गीतकार व संगितकार बालकृष्ण सजिवयात अन्तर्राष्ट्रिय समाजसेवी जुयादीगुलिं, इन्द्र महर्जनयात किलाघःया दीप्याखंया गुरुकथं परम्परागत बाजंया संरक्षण यानादीगुलिं व विनोद शाही (हिमाली सर)यात डोल्पा वनाः शिक्षाया विकास यानादीगुलिं सम्मान याःगु खः ।

येँमनपा १८ वडा वडाध्यक्ष न्हुछेकाजी महर्जनया सभापतिइ जूगु ज्याझ्वलय् पाहांपिं येँ क्षेत्र नं. ७ या सांसद रामवीर मानन्धर, प्रदेश सभाया सांसद वसन्त मानन्धर, मूपाहां मेयर शाक्यपिंसं थःथःगु नुगः खँ प्वंकादीगु खः । ज्याझ्वलय् येँ मनपा १८ वडां दछिया दुने थःपिंसं यानागु प्रगतिया बारे बुलेटिन पिकयाः जानकारीया निंतिं सकसितं इनाः बिउगु खःसा ज्याझ्वः येँमपा १८ वडाया महिला सदस्य शोभा महर्जनं संचालन यानादीगु खः ।

सम्बन्धित बुखँ

LEAVE YOUR COMMENTS