अमेरिकाय् गोली लाःम्हेसिया उपचारया निंतिं नेवाः गुथिया संयोजनय् ग्वाहालि मुनेगु सुरु

येँ – अमेरिकाय् लुटेरातय्सं गोली कयेकाः सिकिस्त जुयाच्वंम्ह रचना श्रेष्ठया उपचाया निंतिं नेवाः गुथि न्यूयोर्कया संयोजनय् ग्वाहालि मुंकेगु ज्या जुयाच्वंगु दु । मय्जु श्रेष्ठयात म्हीग अक्लोहमाय् च्वंगु बडीज ह्याण्डी मार्टय् च्वंगु ग्यास स्टेशनय् ज्या यानाच्वंगु इलय् छम्ह लुटेरां गोली कयेकूगु खः । वय्कःया म्हय् च्यागः गोली लाःगु व वय्कःया अवस्था चिन्ताजनक दुगु खँ धाःगु दु ।

झिंछला न्ह्यव जक अमेरिका थ्यंम्ह मय्जु श्रेष्ठया जहान व निदँत्या दुम्ह काय नं अमेरिकाय् दु ।

ग्यास स्टेशनय् गोली कयेकेवं श्रेष्ठयात हेलिकप्टरय् तयाः उपचारया निंतिं टल्सा शहरया सेन्ट फ्रान्सिस अस्पतालय् यंकूगु खः । अन वय्कःया म्हं न्यागः गोली लिकायेधुंकूगु खँ वय्कःया जहान कपिल श्रेष्ठं जानकारी बिउगु दु । मय्जु श्रेष्ठया जँ, न्यता, लप्पा, प्वाः व नुगस्येँया क्वय्या भागय् गोली लाःगु खँ धाःगु दुसा वय्कःयात अझं होस मवःनिगु खँ धाःगु दु ।

मय्जु श्रेष्ठया जहान कपिल श्रेष्ठं नं थःपिं अमेरिका थ्यंगु नकतिनि झिंछला जक दुगु धासें थःपिंत ग्वाहालि यायेत इनाप याःगु दु ।
वय्कःया उपचारया निंतिं ग्वाहालिया निंतिं थःपिंत स्वापू तयेफइगु खँ नेवाः गुथि न्यूयोर्कं धाःगु दु ।