कांग्रेसपाखें संविधान संशोधनया विधेयक दर्ता

येँ – नेपाली कांग्रेसया च्याम्ह सांसदतय्सं संविधान संशोधनया निंतिं गैरसरकारी विधेयक दर्ता याःगु दु । संघीय समाजवादी नेपाल व राष्ट्रिय जनता पार्टी नेपालं संविधान संशोधनया निंतिं गैरसरकारी विधेयक दर्ता याःगु कन्हय् कुन्हु कांग्रेसं संसदीय सचिवालयय् न्हूगु प्रस्ताव दर्ता याःगु खः ।

कांग्रेसया नेतृत्वय् सरकार दुगु इलय् न्ह्यःने हःगु संविधान संशोधनया प्रस्तावयात पार्टीया केन्द्रिय कार्यसमितिया निर्णय कथं संसद सचिवालयय् दर्ता याःगु खः । विधेयक दर्ता लिपा कांग्रेस नेता अमरेशकुमार सिंहं पार्टीया कार्यसमितिया निर्णय कथं विधेयक दर्ता यायेगु ज्या जूगु धयादिल ।

कांग्रेस नेता उमाकान्त चौधरीया नेतृत्वय् वंगु पुचलं नेपाःया संविधानया धारा ७, ११, ३८, ८६, २७४, २८२, २८३ व २८७ यात संशोधन यायेमाःगु धासें विधेयक दर्ता याःगु खः । विधेयकय् भाषा, नागरिकता, प्रदेशया सीमा हरेफेर, राष्ट्रियसभाया प्रतिनिधित्व लगायतया विषयत दुथ्याकातःगु दु ।

संसद सचिवालयय् दर्ता जूगु विधेयक उमाकान्त चौधरी, अमरेशकमार सिहं, प्रदीप गिरी, तेजुलाल चौधरी, चित्रलेखा यादव, अभिशेक प्रताप शाह, नमिता चौधरी व पद्मनारायण चौधरीं मंकाः ल्हाःचिं तया दर्ता याःगु खः ।