‘येँ देय् म्हसीके’ बारे सहलह

येँ (नेपालभाषा टाइम्स) – नेपालभाषाया माध्यमं स्थानीय विषय ब्वंकेत्यनागु खँयात कयाः येँ महानगरपालिकापाखें थीथी संस्थागत स्कूलतय् संगठन प्याब्सन व एन प्याब्सनया पदाधिकारीतलिसे सहलह यात । येँ महानगरया म्हसीका बीगु ल्याखं महानगरपालिकां ‘येँ देय् म्हसीके’ नामं १ तगिंनिसें ८ तगिं तकया पाठ्यक्रम तयार याःगु खः ।

येँ मनपा शहरी योजना आयोगया थापाथलीस्थित ज्याकुथी जूगु उगु सहलह ज्याझ्वलय् संस्थागत विद्यालय संघ, अभिभावक संघया पदाधिकारीतय्सं थ्व पाठ्यक्रम नेपालभाषां ब्वंकूसां विद्यार्थीतय्त खास हे समस्या मजुइगु बिचाः प्वंकादीगु खः । ज्याझ्वलय् पाठ्यक्रम तयार यायेत येँ मनपां गठन याःगु समितिया दुजः वरुण प्रसाद वैद्य लिसें शहरी योजना आयोगया दुजः गुजेश्वरी श्रेष्ठपिंसं पाठ्यक्रम व उकिया आवश्यकता बारे कनादीगु खः ।

वय्कःपिंसं थ्व पाठ्यक्रम येँ देय्या म्हसीकालिसे सम्बन्धित जूगु व उकिया भाषा जक नेपालभाषा जूगु कारणं थ्व भाषा स्यनेगु विषय मखु धइगु खँ स्पष्ट यानादिल । थ्व पाठ्यक्रमय् मस्तय्त ब्वंकेगु स्वयां नं अवलोकन व भ्रमण मार्फत स्यनेकने याइगु जूगुलिं थुकिया पठनपाठन सरल जुइगु खँ नं वय्कःपिंसं कनादीगु खः ।

थ्वहे झ्वलय् बनेपा नगरपालिकां नं आः १ तगिंनिसें ३ तगिं तक नेपालभाषाया माध्यमं स्थानीय ब्वंकेगु धकाः निर्णय जूगु खँ सीदुगु दु। स्थानीय नेवाः अभियन्तातय्सं बनेपा नगरपालिकाया मेयरलिसे थुकिया बारे खँल्हाबल्हा याःगु खःसा उगु इलय् मेयरं आःयात ३ तगिं तक ब्वंकेगु व वयां लिपा कक्षा थपे यायां वनेगु खँ कनादीगु खः । थुकिया लागिं अन नं माःगु तयारी शुरु याःगु खँ सीदुगु दु ।