कर्मचारी सरुवा विरुद्ध प्रदेश सरकार

येँ- संघीय सरकारं थः यःयःथे कर्मचारी सरुवा यानाच्वंगु खँय् प्रदेश सरकारतय्सं आपत्ति प्वंकूगु दु । बल्ल बल्ल प्रदेशया ज्याय् खटे जुयाः वःपिं कर्मचारीतय्त केन्द्रं हानं मेथाय् सरुवा याना बिउगुलिं प्रदेश सरकारत तम्वःगु खः । संघीय सरकारं प्रदेश सरकारयाके छुं सल्लाह तकं मयासे थःथाय् ज्या यानाच्वंपिं कर्मचारीतय्त धमाधम सरुवा याःगुलिं प्रदेश सरकार तम्वःगु खः ।

केन्द्र सरकारं याःगु थज्याःगु ज्यायात प्रदेश नम्बर २ या मुख्यमन्त्री लालबाबु राउतं लिखित पौ हे छ्वयाः थःपिनि आपत्ति प्रकट याःगु खँ सीदुगु दु । वय्कलं केन्द्र सरकारयात छ्वःगु पती प्रदेशय् वयेत कर्मचारीत माने मजूसां बल्ल बल्ल प्रदेशय् वयाः ज्या सुरु यानाः सम्हाले जक याःबलय् उमित तुरुन्त मेथाय् सरुवा याःगुलिं प्रदेशया ज्या भद्रगोल जूगु खँ न्ह्यथना तःगु दु ।

संघीय सरकारया थज्याःगु ज्यां यानाः प्रदेशया सरकारी कार्यालयत चले याये थाकुइ धासें मुख्यमन्त्री राउतं सरकारं संघीय व्यवस्थाया मर्मयात थुइकाः जक थज्याःगु ज्या यायेत इनाप नं यानादीगु दु ।

अथे हे प्रदेश नम्बर १ या मुख्यमन्त्री शेरधन राईनं नं थःगु थासय् बल्ल बल्ल वःपिं कर्मचारीतय्त केन्द्रं मेथाय् सरुवा याना बिउगुलिं प्रदेशया कार्यालयत प्रभावित जूगु दावी यानादीगु दु ।