मोहनि न्ह्यःने शेयर बजाः कुहांवन

येँ – आइतवाः न्हापांगु न्हिं शेयर बजाः दोहोरो अंकं कुहां वंगु दु । आइतवाः परिसूचक १०.४७ अंकं कुहां वयाः १२५६.७१ अंकय् थ्यंगु दु । अथेहे ‘क’ वर्गया कम्पनीया कारोबार मापन याइगु सेन्सेटिभ इन्डेक्स २.१४ अंकं कुहां वयाः २६७.०९ अंकय् थ्यंगु दु । मोहनि नखः न्ह्यःने वःगु व बैंकया ब्याज पुलेगु ई जूगुलिं शेयर बजाः कुहां वःगु खँ बजार विश्लेषकपिंसं धाःगु दु ।

विज्ञतय्सं थ्व तःधंगु समस्या मखु धासें आँटे चायेमाःगु अवस्था मदुगु खँ धाःगु दु । आइतवाः १६६ कम्पनीया २० लाख कित्ता शेयर ५८ करोड ४९ तकां न्याये–मीगु ज्या जूगु दु । थुकी दकलय् अप्वः ग्लोबल आइएमइ बैंकया ६ करोड ४९ तका बराबरया कारोबार जूगु दु । उपसूचकय् ट्रेडिङ बाहेक फुक्कं सूचक कुहां वंगु दु । ट्रेडिङ १.८६ अंकं थहां वःगु दु ।