छगू हे दबुलिइ प्यसःम्ह कलाकारपाखें बाजं ब्वज्या
येँ(नेपालभाषा टाइम्स)÷नेपाःया सांगीतिक इतिहासय् न्हापांखुसी नेवाःलिसें थीथी आदिवासी जनजातिया मौलिक व परम्परागत बाजंया छगू हे दबुलिइ ब्वज्या याःगु दु । वंगु शनिवाःथनया खुल्लामंचय् नेपाःया थीथी जाति व भाषिक समुदायया बाजंया ब्वज्या याःगु खः ।
येँ महानगरपालिका व ज्यापु महागुथि नेपाःया मंकाः ग्वसालय् नेवाःलिसें नेपाःया थीथी आदिवासी जनजातिया पीताजिया बाजं छगू हे दबुलिइ ब्वज्या याःगु खः ।
अन्तर्राष्ट्रिय संगीत दिवसया लसताय् ‘नेपाल अर्केष्ट्रा–११४३’या नामं जूगु सांगीतिक ब्वज्याय् नेपाःया थीथी जातिया मौलिक व परम्परागत ४० गू लोकबाजं १२ गू तालय् न्ह्यब्वःगु खः । सांगीतिक इतिहासय् न्हापांखुसी जूगु ब्वज्याय् झण्डै प्यसःम्ह कलाकारं छगू हे दबुलिइ च्वनाः उकथंया ब्वज्या याःगु खः ।
प्रधानमन्त्री पुष्पकमल दाहाल प्रचण्डं ब्वज्याया उलेज्या यानादिसें संगीतिक ख्यःया प्रवद्र्धनया निंतिं सरकारपाखें फक्व ग्वाहालि यायेगु प्रतिवद्धता प्वंकादिल । लिसें वय्कलं थः न्हापांखुसी प्रधानमन्त्री जुयागु इलय् संगीत व सांस्कृतिक ख्यःया निंतिं छुं यायेगु ह्वःताः चूलाःगु खँ लुमंकादिसें थुगु ख्यःयात निरन्तरता बीगु इच्छा दु धयादिल ।
थुकथंया अर्केष्ट्रा ज्याझ्वलं परम्परागत बाजं जक मखु थनया मौलिक कला संस्कृतिया नं संरक्षण यानाः पर्यटन प्रवद्र्धनय् तःधंगु योगदान बी धइगु खँय् थःत विश्वास दु धासें प्रम दाहालं धयादिल, ‘संस्कृति संरक्षणय् लगे जुयाच्वंपिं थुगु ख्यःया सकसितं सरकारं ग्वाहालि यायेगु जुइ ।’
बागमति प्रदेशया पर्यटन, उद्योग व सहकारी मन्त्री पुकार महर्जनं कला संस्कृतिया संरक्षण याना तये फःसा जक देशय् पर्यटक दुकायेगु व आर्थिक विकासय् तिबः बी फइ धयादिल । प्रदेश सरकारपाखें वइगु आर्थिक दँया बजेटय् स्वनिगःया कला, संस्कृति संरक्षणया निंतिं बजेट व्यवस्थापन यायेगु जुइ धासें प्रदेशया सरकारी कामकाजी भाय्या रुपय् नेवाः व तामाङ भाय््यात छ्यलाबुलाय् हयेगु वातावरण तयार जुजुं वनाच्वंगु जानकारी बियादिल ।
ज्याझ्वःयात संबोधन यानादिसें येँ महानगरपालिकाया उपप्रमुख सुनिता डंगोलं सकलें छप्पँ जुयाः बाजंया प्रस्तुति बिउथें थथे हे झी सकलें छप्पँ जुयाः समाजसेवा, देय्या सेवा यायेगु ज्याय् नं न्ह्याः वने माःगु आवश्यक दु धयादिल । कला, संस्कृति, सम्पदा ल्यनाच्वन धाःसा जक देय्या म्हसीका ल्यंका तये फइ धासें सकलें छप्पँ जुयाः देय् निर्माणया निंतिं न्ह्यचिलेमाःगु दु धयादिल ।
देय्या मौलिक कलाकृति, संस्कृति, सम्पदा संरक्षण याना तये फत धाःसा देय्या म्हसीका नं ल्यनाच्वनी धासे वय्कलं येँ महानगरयात धाथेंया सांस्कृतिक नगरी दयेकेगु म्हगस पूवंकेत इनाप यासें उकिया निंतिं महानगर दुनेया कला, संस्कृति, सम्पदा थेंज्याःगु विषययात प्रवद्र्धन व संवद्र्धन यायेमाःगु आवश्यक दु धयादिल । देय्या दक्वं जातजाति, समुदायया मौलिक बाजं छगू हे थासय्, छगू हे दबुलिइ थ्वयेकेगु उद्देश्य थौं पूवंगु दु धयादिल ।
वरिष्ठ वाद्यगुरु न्हुछेबहादुर डंगोलं संयोजन यानादीगु अकेष्ट्रा ब्वज्याया उलेज्याझ्वलय् नेवाः देय् दबूया नायः पवित्र वज्राचार्यं नं नुगःखँ तयादीगु ज्याझ्वः ज्यापु महागुथि नेपाःया नायः राजभाई जकःमिया सभापतित्वय् जूगु खः ।
LEAVE YOUR COMMENTS