न्हिंन्हिंया प्रदर्शनं यातायात अस्तव्यस्त

येँ (नेपालभाषा टाइम्स) – प्रधानमन्त्री केपी ओलीं संसद विघटन यायेवं थीथी राजनीतिक पार्टीतय्सं न्हिथं प्रदर्शन याःगुलिं ट्राफिक व्यवस्था अस्तव्यस्त जूगु दु। वंगु आइतवाः निसें न्हिथं प्रदर्शन जुइवं यातायात व्यवस्थापन यायेत समस्या जूगु खः । विशेष यानाः येँया फिब्व ख्यः, थापाथली, कुपन्डोल, बागबजाः, पुतली सतक, भद्रकाली, शान्ति बाटिका, ग्वंगःबुँ, त्रिपुरेश्वर, कालिमाटी, कलंकी व यलया लगंख्यलय् यातायात अस्तव्यस्त जूगु खः । सवारी साधनया व्यवस्थापन यायेगु निंतिं महानगरीय ट्राफिक महाशाखां अप्वः भिडभाड जुइगु थासय् सवारी साधन ड्राइभर्ट यानाच्वंसां समस्या धाःसा मज्यंगु खँ धाःगु दु। फुक्कं सवारी साधनयात वैकल्पिक लँपुइ छ्वःसां नं यातायात व्यवस्था याये फयाच्वंगु मदुनि ।