चोभारय् आन्दोलन यायेत थौं भेला

येँ – चोभारय् सरकारं शिलान्यास याःगु सुख्खा बन्दरगाहया विरोधय् स्थानीय वासिन्दां आन्दोलनया तयारी याःगु दु ।
थःपिनिगु विरोधया दथुइ नं प्रहरी पाः तयाः शिलान्यास याःगु व उकिया विरोध याःपिंत ज्वंगुया विरोधय् आः गुकथं न्ह्याः वनेगु धइगु बारे सहलह यायेत थौं पुलांगु हिमाल सिमन्ट न्ह्यःने सहलह ज्याझ्वः यायेत्यनागु खँ चोभार संरक्षण समितिया संयोजक पञ्चलाल महर्जनं नेपालभाषा टाइम्स यात कनादीगु दु ।

चोभार संरक्षण समितिं चोभाः लागाय् पर्यटकीय हब दयेकेमाः धकाः माग यानाः सुख्खा बन्दरगाहया विरोध याना वयाच्वंगु खःसा प्रधानमन्त्री लिसें सम्बन्धित थीथी निकायय् ज्ञापनपौ बीगु ज्या यायेधुंकूगु दु । चोभाः लागाय् सुख्खा बन्दरगाह दयेकेबलय् अनया पुरातात्विक महत्वं जाःगु थाय् ध्वस्त जुइ धासें विरोध जूगु खः । न्हापा हिमाल सिमेन्ट दुगु इलय् नं स्थानीय जनतां आपालं समस्या फयेमाःगु धासें आः सुख्खा बन्दरगाह दयेकेल धाःसां थुकिं अझ अप्वः समस्या पिकाइगु धासें विरोध याना वयाच्वंगु खः ।

मेखे वातावरणविदतय्सं नं चोभाः स्वनिगलय् स्वच्छ फय् दुहां वइगु थाय् जूगुलिं अन सुख्खा बन्दरगाह दयेके मजिउगु सुझाव बियाच्वंगु दु । उगु लागाय् भारतं वइगु रेल, चीनं वइगु रेल, भारतया थीथी थासं वइगु कन्टेनर व चीनया केरुङं वइगु कन्टेनर तयेगु योजना दयेकातःगु दु गुुकिया कारणं दुषित जुइगु खँ धाःगु दु ।