प्रदेश १ य् सरकार क्वःदल ः आः ध्यान जसपापाखे

येँ (नेपालभाषा टाइम्स)- प्रदेश नम्बर १ या एमाले सरकार क्वःदःगु दु । मुख्यमन्त्री हिक्मतकुमार कार्कीं प्रदेशसभाय् म्हिगः विश्वासया मत काये मफयेवं सरकार क्वःदःगु खः । कार्की वंगु मंसिरय् जूगु चुनाव लिपा प्रदेशया मुख्यमन्त्री जुयादीगु खः ।

लछि न्ह्यः सत्ता गठबन्धनय् दुथ्याःगु माओवादी व जनता समाजवादी पार्टीं एमालेयात बियातःगु समर्थन लित कायेवं मुख्यमन्त्री कार्की अल्पमतय् लाःगु खः । वयां लिपा वय्कलं विश्वासया मतया नितिं प्रस्ताव तयादीगु खः ।

९३ म्ह सांसद दुगु प्रदेशसभाय् बहुमतया नितिं ४७ म्हेसिया समर्थन माःगु खःसा कार्कीया पक्षय् ४६ मत वःगु खः । विपक्षय् ४३ मत लाःगु दु । म्हिगःया मतदानय् जनता समाजवादी पार्टीया याकःचाम्ह सांसद तटस्थ च्वंगु खःसा प्रतिपक्षीया निम्ह सांसद अनुपस्थित जूगु खः । अनुपस्थित जूपिं थ्व सांसद म्हिगः सदनय् थ्यंगु खःसां मतदान याये त्ययेकाः बेपत्ता जूगु खँ धाःगु दु ।

मुख्यमन्त्री कार्कीं विश्वासया मत काये मफयेवं आः न्हूगु सरकार सुयागु नेतृत्वय् गठन जुइ धइगु अन्यौल ब्वलंगु दु । गठबन्धन दुनेया कांग्रेस व माओवादीं सरकारया नेतृत्व यायेगु धकाः दावी यानाच्वंगु दु । पुलांम्ह मुख्यमन्त्री लिसें नेकपा (एस) या नेता राजेन्द्र राईं नेतृत्व दावी मयायेगु खँ धायेधुंकूगु दु ।

कांग्रेसं थः दकलय् तःधंगु दल जूगुलिं नेतृत्व थःपिंसं याये दयेमाः धकाः दावी यानाच्वंगु दुसा माओवादी केन्द्रं मेमेगु प्रदेशय् कांग्रेसया सरकार दुगुलिं १ नम्बर प्रदेशय् थःपिंत सरकार गठन याके बीमाः धकाः दावी यानाच्वंगु दु । निगुलिं पार्टी अडानं लिहां मवःगुलिं थुकिया निष्कर्ष आः केन्द्रीय गठबन्धनं हे याइगु अनुमान जुयाच्वंगु दु ।
कांग्रेस व माओवादीं सरकारया नेतृत्व यायेगु दावी यानाच्वंसां जसपाया समर्थन मदयेकं सरकार गठन याये फइगु अवस्था धाःसा खने मदु । प्रदेशय् कांग्रेसया २९ क्श सांसद दुसा माओवादी केन्द्रया सभामुख सहित १३ म्ह सांसद दु । उकथं हे नेकपा एकीकृत समाजवादीया प्यम्ह सांसद दु ।

जसपा म्हिगःया विश्वासया मत कायेगु प्रक्रियाय् तटस्थ च्वंगुलिं आः सरकार गठन जुइबलय् नं तटस्थ च्वन धाःसा सरकार गठनया ज्या हे संकटय् लाये फुगु खँ धाःगु दु । जसपाया छगू जक सिट खःसां थ्व छम्ह गन वन अन हे बहुमत खाइगु अवस्था दु । यदि आः नं जसपा तटस्थ जुल धाःसा प्रदेश नम्बर १ मध्यावधि चुनावय् वनेमालीगु अवस्था वये फइगु खँ धाःगु दु । थज्याःगु समस्या मवयेकेत अन राष्ट्रिय सरकार गठनया प्रस्ताव नं न्ह्यःने वःगु दु ।

।