मेट्रो एफएमं विक्रम शाक्य लुमंकल

येँ (नेपालभाषा टाइम्स) – येँ महानगरपालिकां न्ह्याका वयाच्वंगु मेट्रो एफएमया पत्रकार मदुम्ह विक्रम शाक्यया लुमन्तिइ वंगु शुक्रवाः श्रद्धाञ्जली सभा जुल ।

राष्ट्रिय सभागृहय् जूगु श्रद्धाञ्जली सभा मदुम्ह शाक्यया लुमन्तिइ १ मिनेट मौन धारण यासें न्ह्याःगु खः । मदुम्ह पत्रकार शाक्यया किपाय् स्वां देछासे न्ह्याःगु श्रद्धाञ्जली सभाय् नेपाल पत्रकार महासंघ मेट्रो एफएम प्रतिष्ठान शाखाया संस्थापक सभापति श्रीकृष्ण महर्जनं मदुम्ह पत्रकार लुमन्तिइ छुं यायेमाःगु व येँ महानगरपालिकापाखें नं वय्कःया छेँजःयात ग्वाहालि यायेमाःगु खँ कनादीगु खः । मदुम्ह शाक्यया ज्याझ्वः न्ह्याकेगु शैली व वय्कःया यइपुसे च्वंगु सःयात न्यनामिपिंसं अतिकं ययेकूगु खँ नं कनादिल ।

येँ महानगरपालिकाया प्रमुख प्रशासकीय अधिकृत एकनारायण अर्यालं मदुम्ह पत्रकार शाक्यया छेँजःयात येँ महानगरपालिकापाखें ग्वाहालि यायेमाःगु व थुकिया बारे याकनं हे छगू निर्णय यायेगु जुइ धयादिल । मेट्रो एफएमया स्टेशन म्यानेजर केशवप्रसाद नेपाल ‘केशुं’ थः मेट्रो एफएमय् दुहां वयागु इलंनिसें हे मदुम्ह शाक्यनापं अतिकं सतिक च्वनाः ज्या यायेखंगु नापं महानगरपालिकापाखें नं छुं ग्वाहालि याकेगु निंतिं थम्हं कुतः यायेगु जुइ धयादिल ।

येँ महानगरपालिका सूचना प्रविधि विभाग प्रमुख नरेन्द्रविलास वज्राचार्यं थः निक्वःखुसी विभागीय प्रमुख जुया वयेधुंकाः मदुम्ह शाक्यं अप्वःथें फोन यानाः एफएमया ज्याझ्वःयात बांलाकेत कुतः यायेत इनाप यानादीगु खँ लुमंकादिल । लिसें वय्कलं मेट्रो एफएमय् थःगु बछि जीवन फ्यानाः बियादीगु योगदान धाथें हे च्वछाय्बहजू धासें येँ महानगरपालिकापाखें नं वय्कःया छेँजःपिंत ग्वाहालिया निंतिं थःगु थासं कुतः यायेगु जुइ धयादिल ।

मेट्रो एफएमया नेपालभाषा ज्याझ्वः न्ह्याकामि उदेन न्हूसाय्मिं ज्याझ्वः न्ह्याकादिसें थःपिं परीक्षण प्रशारणया इलय् गुकथं मेट्रो एफएमय् आवद्ध जुल व उगु इलय् गुकथं ज्याझ्वः न्ह्याका वया धइगु बारे जानकारी बियादीगु खः ।