येँ व ख्वपय् ३म्हेसित कोरोना, देय्न्यंक थप २६म्ह संक्रमित

येँ – थौं सुथय् जक ५७म्हेसित कोरोना संक्रमण जूगु नेपालय् हानं २६म्ह न्हूपिं संक्रमितत खनेदुगु दु । अथे संक्रमण जूपिं येँ व ख्वप जिल्लायापिं नं जूगु पुष्टि जूगु दु । येँ १म्ह, ख्वलय् २म्ह, पर्साय् १८म्ह, महाेत्तरीइ २म्ह, धनुषाय् २म्ह व सर्लाहीलय् १म्हेसित संक्रमण जूगु दु ।

स्वास्थ्य तथा जनसंख्या मन्त्रालयया कथं येँय् ३३दँया मिसा व ख्वपय् २५दँया मिसा व २७दँया मिजंयात संक्रमण जूगु दु । अथेहे पर्सा जिल्लाय् २२, २८, २८, ३२, ४५, ६०दँया मिसात व १६, २२, २४, २५, २५, २८, २८, ३२, ५९, ५५, ६१ व ६१दँया मिजंतय्त संक्रमण जूगु दु । नापं महोत्तरी जिल्लाय् १६ व ३५दँया मिजं, धनुषा जिल्लाय् २०दँया मिसा व ४०दँया मिजं व सर्लाहीलय् ४५दँया मिजंयात कोरोनाया संक्रमण जूगु दु ।

थ्व नापं थौं छन्हुया दुने नेपालय् ८३म्हेसित कोरोनाया संक्रमण जूगु दु । नेपालय् मुक्कं संक्रमिततय् ल्याः २१७म्ह थ्यंगु दु ।