‘२ नम्बरय् समर्थन लित काःगु मदु’

येँ- केन्द्रय् नेपाल कम्युनिष्ट पार्टीया सरकारय् संघीय समाजवादी फोरम नं समावेश जुइगु खँ न्ह्यानाच्वंगु हे इलय् मेखे प्रदेश नम्बर २ लय् धाःसा संसफोया सरकारयात नेकपां बियातःगु समर्थन लित काःगु चर्चा पिहां वःगु दु । २ नम्बर प्रदेशया संसदय् म्हिगः न्ववासें पुलांगु एमाले संसदीय दलया नेता सत्यनारायण मण्डल व पुलांगु माओवादी संसदीय दलया नेता रामचन्द्र मण्डलं संघीय सरकारया सछिन्हुयात उपलब्धीहिन धाःगु व प्रदेश सरकार भ्रष्टाचारय् लिप्त जूगु कारणं वयात बिया तयागु समर्थन लित कयागु जुल धयादीगु खः ।

तर २ नम्बर प्रदेशय् संसफो सरकारयात नेपाल कम्युनिष्ट पार्टीं समर्थन लित काल धाःगु खँ थःपिंसं धाःसा मन्यनागु खँ संसफोया सहअध्यक्ष राजेन्द्र श्रेष्ठं कनादिल । म्हिगः सुथय् थःपिंसं नेकपाया थीथी नेतातलिसे खँल्हाबल्हा यानागु इलय् तक प्रदेश सरकारयात बिया तयागु समर्थन लित कायेगु बारे छुं खँ मजूगु जानकारी नं वय्कलं बियादिल । यदि अन धाथें समर्थन लित काःगु खःसा थुखे संघीय सरकारय् थःपिं वनेगु लागिं जुयाच्वंगु वार्ता नं स्यनेफुगु खँ वय्कलं कनादिल ।

अमर्यादित धापू डिलिट यायेत माग
संसफोया सहअध्यक्ष राजेन्द्र श्रेष्ठं राष्ट्रपतियात ‘गणतन्त्रया बडामहारानी’ थें च्वं धकाः सदनय् न्ववानादीगु खँयात संसदया रेकर्डं डिलिट यायेमाःगु माग पुलांम्ह सभामुख लिसें नेकपाया उपनेता सुवास नेम्बाङं यानादीगु दु । म्हीग सदनय् न्ववासें वय्कलं राष्ट्रपति थेंज्याःम्ह सर्वोच्च व्यक्तित्व प्रति कटाक्ष यानाः न्ववानादीम्ह श्रेष्ठया धापू हे अमर्यादित जुल धासें उकियात रेकर्डं हे डिलिट यायेमाःगु माग यानादीगु खः । तर सहअध्यक्ष श्रेष्ठं धाःसा थम्हं राष्ट्रपति मखु राष्ट्रपतियात बडामहारानी दयेकेगु कुतः याःम्ह सरकारया जक आलोचना यानागु खः धयादीगु दु ।

सम्बन्धित बुखँ

LEAVE YOUR COMMENTS