क्यानेडियन नेवाःतय् ग्वाहालिं दयेकूगु क्वथाया ताःचा लःल्हात

येँ(नेपालभाषा टाइम्स)- क्यानेडियन नेवाः गुथिया ग्वाहालिं भगवान बुद्धया जन्मस्थल लुम्बिनीइ दयेकूगु नेपाल वज्रयान महाविहारय् निर्माण जूगु क्वथाया ताःचा लःल्हाःगु दु । गुथिया प्रतिनिधिं हालय् जक शान्तिया अग्रदूत भगवान बुद्धया जन्मस्थल लुम्बिनीइ जूगु छगू ज्याझ्वःया दथुइ क्वथाया ताःचा लःल्हाःगु खः । उगु इलय् क्यानाडाया नेवाःतय् ग्वाहालिं नेपाल वज्रयान महाविहारय् निर्माण जूगु क्वथाया नां नं नामाकारण याःगु दु । गुथिया ग्वाहालिं निर्माण जूगु क्वथाया नां ‘अर्चिष्मति भूमि’ नामाकारण याःगु खः ।

लुम्बिनी विश्वविद्यालयया पुलांम्ह उपकुलपतितकं जुयाबिज्याःम्ह बौद्ध विद्वान प्रा. डा. नरेशमान वज्राचार्यं सन् २०१८य् क्यानाडाया टोरन्टो विश्वविद्यालयय् प्रवचन बीत वंगु इलय् गुथिपाखें ग्वसाः ग्वःगु हरिततारा पुजाया झ्वलय् लुम्बिनीइ दयेकाच्वंगु महाविहारया बारे जानकारी बियादीगु खः । उगु इलय् गुथिपाखें छकू क्वथाया निंतिं ग्वाहालि यायेगु ल्याखं दुजःपिंत इनाप याःगु खःसा उकथं प्राप्त जूगु न्यागू लख छतका दां गुथिया मूछ्याञ्जे विमलमान श्रेष्ठं प्रा. डा. वज्राचार्ययात लःल्हानादीगु खः ।

उगु इलय् गुथिया सुं नं दुजःपिं लुम्बिनीइ चाःहिउ वइगु अवस्थाय् प्रयोग याये इच्छुक जुल धाःसा निःशुल्क रुपं प्रयोग याके बीगु आसयसहितया पौ नं लःल्हाःगु खः । बुद्ध जन्मस्थल लुम्बिनीइ थीथी देशं थःपिनिगु मौलिक परम्परा व शैलीया विहार निर्माण यानाच्वंगु तर नेपाःया थःगु हे मौलिक विहार मदुगु खँयात वाः चायेकाः नेपाल परम्परागत बौद्ध धर्म संघपाखें थीथी दाता व संघसंस्थाया ग्वाहालिइ उगु महाविहार निर्माण याःगु खः ।