ने. सं. ११४४ ञलाथ्व दशमी -

सुख्खा बन्दरगाह दयेकेगु ज्या दथुइ हे दीफु

येँ – सरकारं येँया चोभारय् दयेकाच्वंगु सुख्खा बन्दरगाहया ज्या ३० प्रतिशत क्वचायेधुंकूगु दुसां नं लिपा वनाः उगु आयोजना स्थगित जुइफइगु खँ सीदुगु दु । स्थानीय जनतां उगु क्षेत्रय् अन्तर्राष्ट्रिय पर्यटन क्षेत्र दयेकेमाः धकाः माग याना वयाच्वंगु खः । स्थानीय जनताया माग कथं वंगु छुं ई न्ह्यः पर्यटन तथा संस्कृति मन्त्रालयं चोभाः लागाय् अन्तर्राष्ट्रिय पर्यटन क्षेत्र दयेकेगु धकाः निर्णय यायेवं स्थानीय जनतां आः सुख्खा बन्दरगाह दयेकत सरकारं यानाच्वंगु ज्या सितिकं वनीगु खँ धाःगु दु ।

गुथि संस्थानया पुलांम्ह नायः लिसें स्थानीय वासिन्दा पञ्चलाल महर्जनया कथं सरकारं उगु क्षेत्रयात अन्तर्राष्ट्रिय पर्यटन क्षेत्र दयेकेगु धकाः निर्णय यायेधुंकाः आः सुख्खा बन्दरगाह दयेकेगु धइगु बंगुरया खोर व जा नयेगु थाय् छगू थासय् तये थें जूगु धासें आः सुख्खा बन्दरगाह दयेकेगु सम्भावना मदुगु खँ धयादीगु दु ।

सूत्रया कथं आः दयेकाच्वंगु सुख्खा बन्दरगाह निर्माणया ज्या गुगुं नं इलय् स्थगित जुइफइगु खँ धाःगु दु । सरकारया लिसे सम्बन्धित मन्त्रालयया मन्त्रीं तकं चोभाः लागाय् सुख्खा बन्दरगाह दयेके मजिउगु खँय् कन्भिन्स जुइधुंकूलिं यानाः सुख्खा बन्दरगाह
दयेकेगु ज्या स्थगित जुइ फइगु खँ धाःगु दु । भाजु महर्जनं धयादी, ‘सरकारं बजेट फुकेगु ज्या यायेधुंकूगु दु, गुगुं नं इलय् अनया ज्या स्थगित जुल धइगु समाचार वयेफु ।’

वय्कलं न्ह्यःने धयादी, ‘वंम्ह मन्त्री थःत माःगु कयाः वनेधुंकल आः मेम्ह वयाः नं थःत माःगु कयाः वनी वयां लिपा सुख्खा बन्दरगाह स्थतिग जूगु सुचं वइ ।’

चोभारय् सुख्खा बन्दरगाह दयेकेगु निंतिं प्रधानमन्त्री केपी शर्मा ओलीं वंगु दँया माघ ३ गते शिलान्यास याःगु खः । तर शिलान्यासया झ्वलय् हे स्थानीय वासिन्दां विरोध याःगु खःसा शिलान्यास यायेगु नितिं तत्कालीन सरकारं द्वःछि स्वयां अप्वः प्रहरी परिचालन याःगु खः ।