शताब्दीपुरुष जोशी व नेता पोखरेलया इतिहास चर्चा

‘उबलय् भुइजःसि निसें शंखमूल, यल तकयात छगू हे विशाल नगर धाइगु’ शताब्दी पुरुष सत्यमोहन जोशीं एमाले महासचिव ईश्वर पोखरेलयात धयादिल, ‘लिच्छविकालीन राजधानी धयातःगु नरः (हाडीगाउँ) जःखःया थासय् नेपाःया न्हापांगु प्रमाणिक अभिलेख नालातःगु प्रस्तर मूर्ति नं लूगु दु । उकिया उचित संरक्षण जुइमाः ।’

शताब्दीपुरुष जोशीं थःगु लिपांगु सफू ‘नेपाली कलाको रुपरेखा’ (प्राचीन र मध्यकालिन) द्वहलपा कथं बिइवं महासचिव पोखरेलं कैलाशकूट भवन बारे चिउताः क्यनादिल । लिसलय् जोशीं धयादिल, ‘उगु दरवार नं नरलय् हे दुगु धयागु आधिकारिक दस्तावेज धाःसा आःतक लूगु मदुनि ।’अप्वः धयाथें इतिहास, संस्कृतिया अध्ययेता व संचारकःमित जक थ्यनाच्वनीगु जोशीया छेँय् राजनीतिक नेता थ्यंगुलिं वय्कः लय्तायादीगु खः ।

नेता पोखरेलं प्रतिनिधि सभा निर्वाचनया इलय् येँ क्षेत्र नं. ५ पाखें उम्मेदवार जुयाबलय् इतिहास, धर्म व संस्कृति सम्बन्धी विकासया निंतिं थीथी बचं बियागु पूवंकेगु निंतिं संस्कृतिविद् जोशीलिसे निघौ तक सहलह यानादीगु खः । नेपाःया इतिहासय् स्वर्णकाल नालातःगु लिच्छविकालया जुजु अंशु वर्मा व मानदेवं नरलं हे शासन चले याःगु माने यानातःगु दु । निगू दशक न्ह्यव मालीगांया स्थानीयवासी रामभक्त खड्कां छेँ दयेकेत जग म्हूबलय् संवत् १०७ या जुजु जय वर्माया ल्वहंया मूर्ति लुइकूगु व उगु मूर्ति आः छाउनीइ च्वंगु राष्ट्रिय संग्रहालयय् तयातःगु खँ जोशीं कनादीगु खः । व धुंकाःया अभिलेखय् संवत् ३८७ य् जुजु मानदेवं थः अबु धर्मदेवया लुमन्तिइ लाजिम्पाटया धोवीचौरय् विष्णु विक्रान्तया मूर्ति दयेकातःगु लूगु दु ।

महासचिव पोखरेलं निर्वाचनया इलय् थःगु घोषणापत्रय् लिच्छविकालीन राजधानीया रुपय् वैभवपूर्ण इतिहास दुगु नरःया विकासयात विशेष बः बीगु व नरःया पञ्चधारा पुनःनिर्माण यायेगु, तोखायात ऐतिहासिक व साँस्कृतिक नगरी कथं विकास यायेगु खँ न्ह्यथनादीगु खः । अथेहे भुइजःसि, तोखा चण्डेश्वरी लगायत मेमेगु सम्भव दुथाय् धार्मिक, सांस्कृतिक पर्यटकीय पूर्वाधार दयेकेगु व प्रवद्र्धन यायेगु ज्यायात व्यवस्थित यायेगु लिसें धार्मिक सांस्कृतिक गन्तव्य कथं प्रवद्र्धन यायेगु प्रतिबद्धता प्वंकादीगु खः ।

नरःया वासिन्दातय्सं लिच्छविकालीन कैलाशकूट दरवार दयेकेगु इच्छा याःगुलिइ थःम्ह प्रतिबद्धता प्वंकागु खँ नेता पोखरेलं न्ह्यथनादीबलय् भाजु जोशी इच्छा याःसा दयेकेफइगु खँ धयादीगु खः ।

थः जहान मीरा ध्वजू, एमाले केन्द्रीय दुजः सूर्य थापालिसें थ्यंम्ह महासचिव पोखरेलं संस्कृतिविद् जोशीया जीवनय् वःगु थथ्याःक्वथ्या, वय्कलं यानादीगु लोकसंस्कृतिया अध्ययन बारे न्यनादीबलय् भाजु जोशीं रोचक शैलीं थःगु लुमन्ति कनादीगु खः ।