यल मनपां विद्युतीय बस चले याइगु

येँ – यल महानगरपालिकां विद्युतीय बस चले यायेगु तयारी यानाच्वंगु खँ सीदुगु दु । सार्वजनिक साझेदारी (पीपीपी) मोडलय् विद्युतीय बस चले यायेगु निंतिं मनपां गृहकार्य यानाच्वंगु खँ मनपाया प्रवक्ता राजु महर्जनं कनादीगु दु । मनपाया कथं छुं कम्पनीं फुक्कं थःपिंसं हे लगानी यानाः बस सञ्चालन यायेगु प्रस्ताव तःगु खँ सीदुगु दु । छुं कम्पनीं धाःसा मनपालिसे सहकार्य यानाः बस चले यायेगु प्रस्ताव तःगु खँ धाःगु दु ।

निगुलिं प्रस्तावयात कयाः मनपां अध्ययन यानाच्वंगु खँ धाःगु दु । विद्युतीय बस वातावरण मैत्री जूगुलिं उकियात प्राथमिकता बियाः चले याकेगु तयारी जुयाच्वंगु दु । यल सांस्कृतिक व पर्यटकीय नगर जूगुलिं विद्युतीय बस उचित जूगु धासें मनपां थज्याःगु तयारी यानाच्वंगु खः । आःया खुगः निसें च्यागः बस चले यायेगु तयारी जुयाच्वंगु खँ नं प्रवक्ता महर्जनं कनादीगु दु ।

वय्कलं बियादीगु जानकारी कथं तत्कालया निंतिं यल दरवार स्क्वायर लागाय् निं विद्युतीय बस चले यायेगु जुइ । न्हापांगु योजना सफल जुल धाःसा उकियात बुंगः व खोनाय् नं बिस्तार यायेगु कथं तयारी जुयाच्वंगु जानकारी नं वय्कलं बियादीगु दु ।
वय्कलं साझा बस लिसे नं सहकार्य फायेफइगु खँ कनादिसें कम्पनीलिसे नं सहकार्य यानाः न्ह्यावने फइगु खँ धाःगु दु ।

विद्युतीय बस न्हूगु न्यायेबलय् थिके जूसां नं उकिया सञ्चालन खर्च म्हो जुइगुलिं यानाः थुकिं दीर्घकालीन फाइदा जुइगु विज्ञपिंसं धाःगु दु । न्हापा न्यायेबलय् थिकेसां नं मर्मत खर्च व डिजेल गाडीया स्वयां म्हो जुइगुलिं यानाः थुकियात प्रवद्र्धन यायेमाःगु जुयाः मनपां थुकियात प्राथमिकता बियाच्वंगु खः । विद्युतीय बस कुँ मवइगु जुयाः थुकिं वायु प्रदुषण म्हो जुइगु विश्वास नं वय्कलं प्वंकादीगु दु ।