ने. सं. ११४४ कौलाथ्व एकादशी - चालं

मिसा साहित्यकार मुनाया चिबाखं प्रशिक्षण ज्याझ्वः

येँ(नेपालभाषा टाइम्स)-मिसा साहित्यकार मुनाया ग्वसालय् वंगु शनिवाः चिबाखं प्रशिक्षण ज्याझ्वः जुल । थनया न्ह्यःखाय् च्वंगु जन चिकित्सालयय् उगु प्रशिक्षण जूगु खः ।

मिसा साहित्यकार मुनाया नायः अञ्जना ताम्राकारया सभापतित्वय् जूगु ज्याझ्वलय् लुम्बिनी बौद्ध विश्वविद्यालय बौद्ध अध्ययन संकायया डीन डा. माणिकरत्न शाक्य मूपाहांकथं झायादीगु खः ।

ज्याझ्वलय् मूवक्ताकथं झायादीम्ह साहित्यकारलिसें समालोचक धु्रव मधिकःमिं चिबाखंया थीथी पक्षयात कयाः प्रशिक्षण बियादीगु खः । वय्कलं चिबाखं छु खः ? चिबाखनय् दयेमाःगु विशेषता, तत्वया बारे कनादिसें चिबाखं थुकथं च्वयेगु धइगु बारे प्रशिक्षण बियादीगु खः ।

छु गज्याःगु विषययात कःघानाः च्वल धाःसा चिबाखं जुइ धइगु बारे प्रशिक्षण बियादिसें गुगुं घटना, दृश्य, जीवनय् घटे जूगु खँयात हे चिहाकयेत सरल तरिकां न्ह्यब्वयेगु हे चिबाखंया विशेषता जूगु नं कनादिल ।

साहित्यकार मुनाया सल्लाहकारलिसें पूर्व प्राज्ञ लक्ष्मी मालीं मचा, ल्यासे ल्याय्म्हतय्त ब्वने यइगु विषययात कःघानाः साहित्य सृजना यायेमाःगु खँय् बः बियादिल । लिसें वय्कलं झीगु छेँय् मस्तय्सं मेमेगु भासं खँ ल्हाःसां झीसं इपिं नापं नेवाः भासं हे खँ ल्हानाः इमित नं नेवाः भासं खँ ल्हाकेगु स्वयेमाः धयादिल ।

छगू फरक प्रसंगय् न्हापा न्हापा दबुलिइ जुइगु साहित्यिक ज्याझ्वलय् नेवाः भासं हे रचना पाठ यायेगु याना वयाच्वनागु खःसां लिपा मेगु समुदायनाप अप्वः संगत जूगुलिं नेवाः भासं च्वयेगु त्वःफिउगु व थौं वयाः छाय् थम्हं नेवाः भासं मच्वया धइगु खँय् पश्चाताप जूगु खँ कनादिल । लिसें छुं दँ न्ह्यःनिसें थम्हं नेवाः भासं हाकनं च्वयेगु शुरु यानागु खँ कनादिसें झीसं थः मस्तय्त चेतना बी फत, मांभाय्प्रति इमित चेतना थने फत धाःसा इमिसं नं च्वयेगु कुतः याइ धयादिल ।

उगु हे ज्याझ्वलय् मिसा साहित्यकार मुनाया सल्लाहकारय् ल्यःपिं लुम्बिनी बौद्ध विश्वविद्यालय, बौद्ध अध्ययन संकायया डिन डा. माणिकरत्न शाक्य, समालोचक प्रा. प्रेमशान्ति तुलाधर, पूर्व प्राज्ञ लक्ष्मी माली, साहित्यकार लिसें समालोचक ध्रुव मधिकःमि, कवयित्री प्रतिसरा साय्मि व साहित्यकार भाजु केशरमान ताम्राकारयात सल्लाकारया दसिपौ नं लःल्हाःगु खः ।