सः छगूया गुंगूगु श्रृंखला क्वचाल

यल – सः छगू फरक अभिव्यक्तिया गुंगूगु श्रृंखला वंगु शनिवाः क्वचाल । लाया न्हापांगु शनिवाःपतिकं स्वम्ह चिबाखं च्वमिपिंत ब्वनाः न्ह्याका वयाच्वंगु थुगु ज्याझ्वः अन्तर्गत वंगु शनिवाः जूगु गुंगूगु संस्करणया ज्याझ्वलय् चिबाखं च्वमिपिं न्हुछेभक्त कवां, माणिक उराय व विजयरत्न असंबरें थःथःगु चिबाखं वाचन यानादीगु खः ।

ज्याझ्वलय् स्वम्हं च्वमिं खुपु चिबाखं वाचन यानादीगु खःसा वाचन जूगु चिबाखंयात कयाः साहित्यकार शाक्य सुरेनं समालोचना यानादीगु खः । ग्वसाः खलःया नरेश अमात्यं लसकुस यानादीगु ज्याझ्वलय् बाखं ब्वनादीपिंत मोक्षबहादुर अमात्यं स्वांमाः क्वखायेकाः लसकुस यानादीगु खःसा ग्वसाः खलःया मेम्ह दुजः सुधीर ख्वबिं स्वम्ह स्रष्टायात मतिनाया चिं लःल्हानादीगु खः ।

ज्याझ्वलय् उपस्थित जुयादीपिंमध्ये गोलाप्रथां पुष्पराम मुनंकःमियात सिरपाः नं लःल्हाःगु खः ।