अन्ततः पालंपाः प्रम जुइगु निर्णय, स्वदँ ओली व निदँ दाहाल प्रधानमन्त्री जुइगु भद्र सहमति
येँ – अन्ततः माओवादीपाखें यानाच्वंगु मागयात स्वीकार यासें एमाले पालंपाः प्रधानमन्त्री जुइगु प्रणालीइ वनेत तयार जूगु दु । पार्टी एकीकरण लिपा पार्टीया नेतृत्व एमाले अध्यक्ष व माओवादी अध्यक्ष निम्हेस्यां मंकाः कथं यायेगु व सरकारया नेतृत्व चाहिँ पालंपाः यायेगु खँय् सहमति जूगु खः ।
सूत्रं धाः कथं निम्ह नेताया दथुइ जूगु सहमति कथं न्यादँया कार्यकालय् एमाले अध्यक्ष ओलीं स्वदँ व माओवादी अध्यक्ष दाहालं निदँ सरकार चले यायेगु खँ जूगु दु ।
थ्व स्वयां न्ह्यः माओवादी अध्यक्ष पुष्पकमल दाहालं एमाले अध्यक्ष केपी ओलीलिसे जूगु सहमति कथं थः नं याकनं हे प्रधानमन्त्री जुइ खनी धकाः मंगलवाः चितवनय् जूगु छगू सभाय् न्ववानादीगु खः । तर दाहालया उगु सम्बोधनयात एमालेया सचिव प्रदिप ज्ञवालीं अस्वीकार यानादीगु खः । अले पालंपाः प्रधानमन्त्री जुइगु प्रस्ताव प्रति एमाले सहमत मजूगु व थ्व ज्या जनमत विरुद्ध नं जुइगु बिचाः वय्कलं तयादीगु खः । अथे खःसां निगुलिं पार्टीया शीर्ष नेतातय् दथुइ जूगु ‘वान टु वान’ वार्ताय् थ्वहे सहमति जूगु खः ।
ओलीयात प्रधानमन्त्री दयेकेगु प्रस्ताव पारित यायेत म्हिगः च्वंगु एमाले स्थायी समितिया बैठकय् अध्यक्ष ओली थम्हं हे पालंपाः सरकार चले यायेगु सहमति जूगु जानकारी बियादीगु खः । स्थिति जटिल खःसां माओवादीपाखें वःगु थ्व प्रस्तावयात स्वीकार यानाः वनेगु बाहेक मेगु विकल्प मदुगु जुयाः थःपिंसं उकियात स्वीकार यानागु खँ नं अध्यक्ष ओलीं कनादीगु खः । प्रम जुइगु न्हापांगु पाः धाःसा ओलीं हे कयादी ।
LEAVE YOUR COMMENTS