२७ भोलुमया बुद्धकालीन नेपाली विश्वकोष

येँ – आचार्य भिक्षु डा. अमृतानन्द महास्थविरं थनिं प्यंगू दशक न्ह्यः बुद्धवचन त्रिपिटकया पात्र, ब्यक्तिपिनि बारे च्वयाबिज्याःगु बुद्धकालीन ग्रन्थत यलया गाःबहालय् च्वंगु वीर–पूर्ण पुस्तक संग्रहालयपाखें पुनःमुद्रित जुयाः पिदंगु दु ।

‘बुद्धकालीन नेपाली विश्वकोश’ नामं पुनःमुद्रित जुयाः २७ गू भोलुमय् पिहां वःगु थुगु ग्रन्थत धर्मप्रेमीतय्सं मब्वँसें मगाःगु, सदा संग्रहणीय जूगु व खस नेपाली भाषा लगायत विश्वया छुं नं भाषाय् थुलिमछि भोलुमय् थजाःगु ग्रन्थत मच्वःनिगु खँ प्रकाशन संस्थां धाःगु दु ।

थ्व ग्रन्थया अध्ययनं नक्कली खँय्, मखुगु भ्रम, अन्धविश्वास, सुयां नं स्वार्थय् तमक्यँसे थःगु शरीर व मनयात ब्यर्थय् अनेक खँय् भड्के मजुइकेगु नापं परियत्ति शिक्षा अध्ययन व अनुसन्धान याइपिं, धर्मय् स्वाबलम्बी जुयाः म्वायेत उपयोगी जुइ । नापं थः लगायत थः सन्ततीतय्त तक नं अन्धधर्म वा मेमेगु धर्मय् मचायेक लगे जुइगुपाखें बचे जुइत तिबः जुइगु खँ नं धाःगु दु ।

सफू प्रकाशनया ल्याखं समेत थ्व छगू महत्वपूर्ण ग्रन्थ जूगु खँ नं धाःगु दु । थ्व जीवनोपयोगी विश्वकोश ग्रन्थ पूरा सेट २७ भोलुम (१३,००० पृष्ठ सिबें अप्वः दुगु) या सफू मू झिद्वः तका तयातःगु दु । अथे नं शुभारम्भ भावय् धाःसा २० प्रतिशत छुट बियाः च्याद्वः तकां बिक्री जुयाच्वंगु दु ।