येँ देय्या देय् आचागू क्वचाल
येँ(नेपालभाषा टाइम्स)- येँ देय्या दे आचागू क्वचाल । वंगु चिल्लागा अस्तमि व नवमि निन्हुयंकं जूगु दे आचागूया झ्वलय् हनाज्याझ्वः, शिक्षा ख्यलय् उत्कृष्ट ल्याः हयादीपिंत थीथी सिरपाः लःल्हायेगु व सफू पितब्वज्या नं याःगु खः ।
दे आचागूया न्हापां दिं चिल्लागा अस्तमि बुधवाःकुन्हु स्वयम्भू महाचैत्य न्ह्यःने, कलश पुजा, शान्तिपुलिइ मामकि पुजा याःगु खः । थ्वकुन्हु थथुपुँइया पाःलाःपाखें दान प्रदानलिसें भुइख्यलय् गणचत्र पुजा नं याःगु खः ।
न्हापांगु दिंकुन्हु वज्राचार्य संरक्षण गुथिया नायः सागरमान वज्राचार्यया सभापतित्वय् जूगु ज्याझ्वलय् थुगु दँय् जूगु चुनावय् निर्वाचित जुयादीपिं वज्राचार्य समुदायया जनप्रतिनिधिंित हनेज्या नं याःगु खः । ज्याझ्वलय् बागमति प्रदेशय् ८ नं क्षेत्रपाखें निर्वाचित शैलेन्द्रमान वज्राचार्य, क्षेत्र नं ९ पाखें निर्वाचित नूरज वज्राचार्य व येँ महानगरपालिका २१ वडाअध्यक्ष उदयचुडामणि वज्राचार्ययात भिंतुना पौ लःल्हासे हनेज्या याःगु खः ।
थुकथं हे ज्याझ्वलय् एसइइनिसें विद्यावारिधी यानादीपिं वज्राचार्य समुदायया कुलपुत्र कुलपुत्रीपिंत नं थीथी पदक लिसें सिरपाः लःल्हाःगु खः । गुथिया निंतिं छगू लख तका आर्थिक ग्वाहालि यानादीम्ह विद्याबहादुर वज्राचार्ययात दोसल्ला न्ययेकाः हनेज्या याःगु ज्याझ्वलय् गुथिया अध्यक्षलिसें जनप्रतिनिििधपिंसं गुथिया मूछ्याञ्जे नापं साहित्यकार मुनीन्द्ररत्न वज्राचार्यं च्वयादीगु निबन्ध सफू ‘ख्यें सगं’या नं पितब्वज्या यानादीगु खः ।
दे आचागूया निन्हुया दिं हनुमानध्वखा लाय्कू दुने नासः चुकय् क्वथुपुँइया पाःकथं मामकि व वज्रसत्व पुजालिसें लोकोत्तर पुजा यानाः पाःलाःपाखें दान प्रदान याःगु खः । थन जूगु ज्याझ्वलय् वज्राचार्य क्लबपाखें प्यम्ह पाःलाःपिं प्रकाश वज्राचार्य, चक्रेश्वर शंखरानन्द वज्राचार्य, आनन्द वज्राचार्य व सन्तमान वज्राचार्ययात सुभाय् पौ देछाःगु खःसा ग्वाहालि यानादीपिंत मतिनाया चिं लःल्हाःगु खः ।
थुकथं हे ज्याझ्वलय् निवर्तमान राष्ट्रपति विद्यादेवी भण्डारीपाखें ‘शताव्दीपुरुष सत्यमोहनजोशी नेपालभाषा ११४३’ सिरपाः लःल्हाना कयादीगु व वज्राचार्य क्लबपाखें ‘ वल्र्ड लाइभआचिभमेण्ट ११४३’पाखें सम्मानित जुयाबिज्याम्ह बौद्ध विद्वानलिसें नांजाःम्ह साहित्यकार फणीन्द्ररत्न वज्राचार्ययात अभिनन्दन पौ नं लःल्हाःगु खः ।
LEAVE YOUR COMMENTS