मध्यपुर संचार समाजया स्वक्वःगु अधिवेशन

थिमि – मध्यपुर संचार समाजया स्वक्वःगु अधिवेशन आः नकतिनि जुल । अधिवेशनया उलेज्या मध्यपुर थिमि नगरपालिकाया प्रमुख न्हूगु नेतृत्व ल्यःगु दु । संचारकःमि बाबुकाजी साःछेँ श्रेष्ठया नेतृत्वय् झिंछम्हेसिया न्हूगु ज्यासना पुचः ल्यःगु खः ।

समाजया न्हूगु ज्यासना पुचःया उपाध्यक्षय् सागर गुरागाइँ, सचिवय् सुमन श्रेष्ठ, कोषाध्यक्षय् चन्द्रकृष्ण श्रेष्ठ, सहसचिवय् पृथ्वीराम श्रेष्ठ व दुजलय् कृष्णकाजी मानन्धर, विश्वेश्वर श्रेष्ठ, ज्ञानदेव श्रेष्ठ, ईश्वरलाल श्रेष्ठ, जगत प्रजापतियात सर्वसम्मतिं ल्यःगु दुसा निवर्तमान अध्यक्ष हरिबहादुर श्रेष्ठयात सल्लाहकार व पदेन दुजलय् मनोनित याःगु दु ।

अधिवेशनय् ताःई न्ह्यवंनिसें पत्रकारिता ख्यलय् क्रियाशील जुयाः आम संचारया ख्यलय् बियादीगु योगदानयात कयाः कदर यासें पत्रकार दानदास श्रेष्ठयात थेम्मृङ पत्रकारिता पुरस्कारपाखें सम्मान याःगु खः । वंगु स्वंगू दशक न्ह्यवंनिसें पत्रकारिता ख्यलय् सक्रिय जुयाच्वनादीम्ह श्रेष्ठं झिंच्यादँ तक नेपाल समाचारपत्रय् समाचार डेस्कय् ज्या यानादीगु खःसा थौंकन्हय् वय्कः स्वतन्त्र संचारग्राम वाःपौया सम्पादक जुयाः ज्या यानाच्वनादीगु दु ।

समाजया हरेक अधिवेशनय् संचार संस्था व संचारकःमियात प्रोत्साहनकथं उगु पुरस्कार बीगु याना वयाच्वंगु दु । लिच्छवीकालीन इलय् थिमिया नां थेम्मृङ जुयाच्वंगु खःसा व हे नामं लय्पौ पिथनेगु याना वयाच्वंगु दु । मूपाहां मध्यपुर थिमि नगरपालिकाया प्रमुख श्रेष्ठं संचारकःमिपिंसं तथ्यगत रिपोर्टिङ यायेमाःगु खँय् बः बियादिसें निष्पक्ष स्वयां नं सत्य पक्षया वकालत यानाः सन्तुलित पत्रकारिता यायेमाःगु खँय् बः बियादिल ।

‘छम्हेसिनं छुं छगू विषयय् आधारहीन खँ ल्हानाबी, सम्बन्धित पक्षलिसे खः मखु, जानकारीतकं कायेगु स्वइमखु अले हचुवाया भरय् सामाजिक संजालय् अफवाह न्यंकेगु ज्या याइपिं अप्वया वनाच्वंगु दु’ नगरप्रमुख श्रेष्ठं धयादिल, ‘सुं छम्ह अमुक व्यक्तिं च्वःगु स्रोतविहीन समाचारया आधारय् उकियात हे हुबहू ल्ह्ययाः प्रचार यायेगु चलन अप्वया वनाच्वंगुलिं तथ्यगत समाचा र सम्प्रेषण यायेत इनाप दु ।’

नेवाः पत्रकार राष्ट्रिय दबू, नेपाल आदिवासी जनजाति पत्रकार महासंघ (फोनिज) लगायतया संचार संस्थाया प्रतिनिधि, पत्रकारिता ब्वंकीपिं प्राध्यापक व आपालं प्र्रशिक्षार्थी पत्रकारतय् उपस्थिति दुगु ज्याझ्वलय् व्यावसायिक व पूर्णकालीन पत्रकारिता याइपिंत प्राथमिकता बीमाःगु खँय् नं चर्चा याःगु खः ।

सम्बन्धित बुखँ

LEAVE YOUR COMMENTS