बागमति विचाः याःथें सुचुकुचु मजू

बागमति सफाइ महाभियान न्ह्याःगु नं न्यादँ पुरा जुयाः खुदँय् क्यंसां खुसि धाःसा विचाः याःकथं सुचुकुचु जुइफुगु मदुनि । वि.सं. २०७० जेठ ५ गते शनिवाःनिसें तसकं तामझामपूर्वक बागमति सफाइ महाअभियान वंगु जेठ ५ गते शनिवाःकुन्हु न्यादँ पुरा जुयाः खुदँय् क्यंगु खः ।

सफाइ महाअभियानपाखें प्रभावित जुयाः आतकया दुने देय्न्यंकंया थीथी पीन्यागू स्वउां अप्वः थासय् सफाइ अभियान शुरु जूगु थुकिया छगू सकारात्मक उपलब्धि खत । तर थ्व वंगु न्यादँया दुने बागमति सफा यानाः २० हजार मेट्रिक टन स्वयां अप्वः फोहर व्यवस्थापन यायेगु ज्या जूसां बागमति खुसि सिथं वनेबलय् धाःसा न्हाय्प्वाः तिनाः वनेमाःगु अवस्था दु ।

महाअभियानय् तसकं तातापाकं निसें अभियन्तात वयाः सुचुकुचु यायेगु ज्या जूसां खुसि सिथय् छेँ दनाच्वंपिं धाःसा अझं पुलुपुलु स्वयाच्वंगु दृश्य खंके फइ । खुसि सुचुकुचुया निंतिं स्वयमसेवी पुचलं जनचेतनामूलक अभियान न्ह्याका वयाच्वंसां नं अधिकार सम्पन्न बागमति सभ्यता एकीकृत विकास समितिं अपेक्षा याःकथं ज्या याये फयाच्वंगु मदु ।

थौंकन्हय् समितिया अध्यक्ष जुयाच्वनादीम्ह नरेन्द्रराज बस्नेत झिंछम्हम्ह अध्यक्षया रुपय् ज्या यानाच्वनादीगु दु ।वि.सं. २०५२ सालय् नीस्वंगु समितिया न्हापांम्ह अध्यक्ष विद्यादेवी भण्डारी थौंकन्हय् राष्ट्रपति जुयादी । तर बागमतिइ धाःसा तःधंगु खने दइकथंया छुं हिउपाः मवःगु बागमतिप्रेमीतय् धापू दु ।

समितिया अध्यक्ष बस्नेतं नं सन्तोषजनक रुपं ज्या याये मफुगु स्वीकार यानादी । ‘बागमति सफाइया निंतिं पशुपति, गुह्येश्वरी क्षेत्रय् जक सुचुकुचु यानां मजिउ, मुहान सुन्दरीजल, गोकर्ण क्षेत्रय् फोहर अप्वयाच्वंगु दु, मुहाननिसें हे सफा यायेगु अभियानय् समिति लगे जुयाच्वंगु दु’, वय्कलं धयादिल ।

सफाइ अभियानय् वइपिं गुलिखे अभियन्तातय्सं किपा कयाः सामाजिक संजालय् तयेगु निंतिं बागमति लगायतया खुसि व चक्रपथ सफाइ अभियानय् वनेगु यानाच्वंगु धइगु नं टिप्पणी जुया वयाच्वंगु दु । बागमति सुधारया निंतिं स्थापना जूगु समितिं नेतृत्वदायी भूमिका म्हिते मफुगु धइगु खँय् अभियन्तातय्सं नं सहमति प्वंकेगु याना वयाच्वंगु दु ।

वंगु न्यादँ न्ह्यवंनिसें हे बागमति सफाइ महाअभियानय् सक्रिय रुपं लगे जुया वयाच्वनादीम्ह पूर्व सचिव किशोर थापा विचाः याःकथं सफाइया ज्या मजूसां खुसि सिथय् वनेबलय् गन्ध वइगु म्हो जूगु धयादी । ‘खुसिया लः गुलि यच्चुसे च्वनेमाःगु खः, उलि जुइ मफुसां तबि खुसि सिथय् वाउँसे च्वंगु खने दयाच्वंगु दु । दिनाच्वंगु बागमति सौन्दर्यीकरणया ज्यां गति काःगु दु ।

धः व्यवस्थापन व तिबः बीगु निंतिं पःखाः दनेगु ज्या नं जुयाच्वंगु दु’, वय्कलं धयादी । दक्वं थासय् सरकारी ज्याय् खने दयाच्वंगु सरकारी ज्याया सुस्तता अधिकार सम्पन्न बागमतिया ज्याय् नं खने दयाच्वंगु बागमतिया मुहान क्षेत्रं हे सफाइ अभियानया निंतिं लगे जुयाच्वनादीम्ह छम्ह अभियन्तां कनादिल ।

बागमति सफाइ महाअभियानय् अधिकार सम्पन्न बागमति सभ्यता एकीकृत विकास समिति जक मखसे नेपाली सेना, नेपाल प्रहर, सशस्त्र प्रहरी निसें कयाः थीथी सरकारी निकाय, स्थानीय तह, स्थानीय क्लब संघसंस्था, बैंक वित्तीय संस्था, क्लब, पुस्तकालय, स्कुल कलेजया विद्यार्थी, इलय्व्यलय् जुइगु थीथी इभेन्टय् सहभागित नं लगे जुयाच्वंगु दु ।

अथे हे नेपाल सरकारया पूर्व उच्च अधिकारीनिसें कयाः बहालवाला अधिकारी, संचारकःमि, कलाकार, उद्योगी व्यापारी लगायत थीथी पेशाकर्मित नं अभियानय् लगे जुयाच्वंगु दु । बागमति सफाइ महाअभियानं न्ह्याःगु खुसि सुचुकुचु यायेगु अभियान थौं वयाः स्वनिगःया थीथी खुसि व थाय्बाय् सुचुकुचु यायेगु अभियान नं न्ह्याःगु दु ।

सम्बन्धित बुखँ

LEAVE YOUR COMMENTS