प्रधानन्यायाधीश बिना सुनुवाई याये मदु

येँ- सर्वोच्च अदालतं संवैधानिक परिषद् सम्बन्धी अध्यादेश व उकिया आधारय् याःगु नियुक्ति विरुद्ध लाःगु रिटया सुनुवाई प्रधानन्यायाधीश मदयेक संवैधानिक इजलासय् मन्ह्याकेत अन्तरिम आदेश बिउगु दु ।

म्हिगः न्यायाधीश हरि फुयालया एकल इजलासं संवैधानिक नियुक्तिलिसे सम्बन्धित मुद्दा प्रधानन्यायाधीश सहितया इजलासं याये जिउ कि मजिउ धइगु विषय क्वःमजिउतले संवैधानिक परिषद् सम्बन्धी अध्यादेश व उकिया आधारय् नियुक्ति विरुद्धया सुनुवाई पनेत अन्तरिम आदेश बिउगु खः ।

संवैधानिक परिषद सम्बन्धी अध्यादेशया आधारय् प्रधानन्यायाधीश चोलेन्द्र शम्शेर जबरा नं दुथ्याःगु संवैधानिक परिषदया बैठकं थीथी संवैधानिक निकायया न्यय्म्ह स्वयां अप्वः पदाधिकारी नियुक्ति यायेगु सिफारिस याःगु खः । उगु सिफारिस विरुद्ध लाःगु रिटयात सुनुवाइ जूगु इलय् निवेदकं प्रधानन्यायाधीश जबरां उगु मुद्दा स्वये मजिउगुलिं विदाय् च्वनेमाःगु सुझाव बिउगु खः । वयां लिपा थुकी प्रधानन्यायाधीश विदाय् च्वनाः सुनुवाई यायेगु धाःगु खःसा आः प्रधानन्यायाधीश मदयेक उकिया सुनुवाई याये दइ मखु धकाः मेगु रिट लाःगु खः ।

सम्बन्धित बुखँ

LEAVE YOUR COMMENTS