भिक्षु धम्मपाल महास्थविरया बःचाहाकःगु म्हसीका

श्री शाक्यसिंह विहार, थैना, यलया विहार प्रमुख जुयाबिज्याम्ह श्रद्धेय फ्रा. खु. शोभन भिक्षु धम्मपाल (धर्मपाल) महास्थविर वंगु फागुन १९ गते शनिवाः सुथसिया ८ः२० ताः इलय् अर्बुद (क्यान्सर) ल्वचं कयाः दिवंगत जुयाबिज्यात ।
# प्रव्रजित जीवन
वि.सं. २०१४ साल चैत ४ गते येँया बलम्बुस्थित द्वम्बुँइ वसपोलया जन्म जूगु खः । मां नानीमैया तण्डुकार व अबु भिक्षु धम्मरक्खित (गृहस्थ नां कृष्णबहादुर तण्डुकार)या काय वसपोलया गृहस्थ नां माधव तण्डुकार खः । १४ दँया नच्चा ल्याय्म्हया उमेरय् हे गृहत्याग यानाः २०२८ साल आश्विन ३ गते नेपाःया न्हापांम्ह महासंघनायक श्रद्धेय भद्दन्त, अग्रमहापण्डित प्रज्ञानन्द महास्थविरया उपाध्यायत्वय् श्रामणेर प्रब्रज्या ग्रहण यानाबिज्यानाः श्रामणेर उपगुप्त जुयाबिज्याःगु खः । भगवान बुद्धया गम्भिर शिक्षाया उच्च अध्ययनया निंतिं मित्रराष्ट्र थाइल्याण्डय् बिज्यानाः वसपोल वि.सं. २०११ साल असार १४ गते थाइल्याण्डय् हे कामु संघराजा सोमदेच् फ्रा बुद्धाचनया उपाध्यायत्वय् उपसम्पदा (पूर्ण भिक्षुत्व) ग्रहण यानाबिज्यानाः भिक्षु धम्मपाल जुयाबिज्यात ।

# शैक्षिक यात्रा
वसपोलं सन् १९८२ लय् थाइल्याण्डया महामुकुट बौद्ध विश्वविद्यालयं ‘सासन–सास्त्र–पण्डित’ (स्नातक) परीक्षा उत्तीर्ण याना बिज्याःगु खःसा त्रिभुवन विश्वविद्यालय येँय्पाखें मनोविज्ञानय् स्नातकोत्तर तह अध्ययन यानाबिज्याःगु खः ।

# योगदान
वसपोल श्री शाक्यसिंह विहारया प्रमुख खः । लिसें श्री शाक्यसिंह परियत्ति व प्रौढ शिक्षालयया अध्यक्ष नापं केन्द्राध्यक्ष नं जुयादी । श्री शाक्यसिंह विहार पुनःनिर्माण समितिया नं अध्यक्ष जुयाबिज्याःम्ह वसपोल प्रज्ञानन्द स्मृति स्वास्थ्य क्लिनिकया धर्मानुशासक, मृत्यु संस्कार गुथिया धर्मानुशासक नापं प्रज्ञानन्द स्मृति ज्ञानमाला भजनया सल्लाहकार व अखिल नेपाल भिक्षु महासंघया पुलांगु कार्यसमितिया दुजः नं जुयादी । वसपोल थौंकन्हय् संचालन जुयाच्वंगु ‘बोधि टेलिभिजन’या संस्थापन अध्यक्ष नं खः ।नेपाःया थेरवाद बुद्धशासनया संरक्षण व संवद्र्धन यायेगु झ्वलय् न्यय्म्ह स्वयां अप्वः कुलपुत्र÷पुत्रीयात नं प्रव्रजित शिष्य यानाबिज्याःगु दु । वसपोलं बुद्धगयाय् दँय्दसं जुइगु त्रिपिटक वाचन ज्याझ्वलय् नेपाःपाखें सक्रिय नेतृत्व यायेगु नापं सहभागिता क्यना वयाच्वनाबिज्याःगु दु ।नेपाःया भिक्षु, अनागारिका, उपासक उपासिकापिनिगु थाइल्याण्डय् स्वास्थ्योपचारया निंतिं वसपोलया सक्रियता व निःस्वार्थ ग्वाहालि नं लुमंकेबहजू ।

# सम्मान व उपाधि
वसपोल राष्ट्रिय व अन्तर्राष्ट्रिय थीथी संघसंस्थापाखें थीथी सम्मान व उपाधिं विभूषित जुयाबिज्याःगु दु । २०६४ साल पुस ७ गते वसपोलयात थाइल्याण्ड सरकारपाखें ‘फ्रा.खु. शोभन’ उपाधिं विभूषित यानाबिज्याःगु खः । अथे हे युनिभर्सल पीस फाउन्डेसनपाखें ‘शान्तिया राजदूत’ उपाधिं २०६३ मंसिर ७ गते, वल्र्ड बुद्धिष्ट संघ युथ, श्रीलंकापाखें ‘नोबल बुद्धपुत्त अवार्ड’ उपाधि– सन् २०११, थाइ संस्था कम्माधिकार शासनपाखें ‘बुद्धगुण उपकान कञ्चनकीर्तिगुण’ उपाधि–सन् २०११, वल्र्ड पीस युनिभर्सिटीपाखें ‘मानार्थ विद्यावारिधी’ उपाधि– सन् २०१२, धम्मलक्खणशीला फाउण्डेसन थाइल्याण्डं ‘अभिजाती व्यक्ति’ उपाधि सन् २०१३ व डब्लुएफबीवाइपाखें ‘द वल्र्ड बुद्धिष्ट आउटस्टाण्डि· लिडर अवार्ड’– सन् २०१५ पाखें सम्मानित जुयाबिज्याये धुंकूगु दु ।

# प्रकाशित कृति
वसपोलं थःगु जीवनय् आपालं सपूmत नं पिथनाबिज्याःगु दुसा थीथी लुमन्ति पौया सम्पादन नं यानाबिज्याःगु दु । वसपोलं नेपाःया संघमहानायक भन्तेया जीवनी (सन् १९८५) लय् पिथनाबिज्याःगु खःसा संघमहानायक भिक्षु प्रज्ञानन्द महास्थविरया सामूहिक अभिनन्दनया सम्पादन (सन् १९९०), प्रज्ञानन्द स्मृतिग्रन्थया संयुक्त सम्पादन (सन् १९९५) यानाबिज्याःगु दु ।
थुकथं हे बुद्धपुजा (सन् २००२) व त्रिरत्न वन्दना व परित्राण (नेपालभाषां सन् २००२ व खस् भासं सन् २००३)य् पिदंगु दुसा थ्व बाहेकं वसपोलं आपालं थीथी पत्रपत्रिकाय् समसामयिक च्वसु नं च्वयाबिज्याःगु दु ।

# भाषाया ज्ञान
वसपोल नेपालभाषालिसें खस् भाय्, हिन्दी, थाई, संस्कृत, पालि नापं अंग्रेजी भाय्या नं ज्ञाता जुयादी ।

# विदेश यात्रा
वसपोलं थःगु जीवनकालय् थाइल्याण्ड, सिंगापुर, मलेसिया, ताइवान, म्यानमार, श्रीलंका, तिब्बत, भारत, भियतनाम, कम्बोडिया, इन्डोनेसिया लगायतया देय्या भ्रमण यानाबिज्याःगु दु । वंगु फागुन १९ गते शनिवाःकुन्हु यलया हरिसिद्धिइ च्वंगु नेपाल क्यान्सर हस्पिटल एण्ड रिसर्च सेन्टरय् दिवंगत जुयाबिज्याःम्ह श्रद्धेय भिक्षु धम्मपाल (धर्मपाल) महास्थविरया अन्त्येष्ठि थेरवाद बौद्ध परम्पराकथं थौं न्हिनसिया १ ताःइलय् शवयात्रासहित शंखम्वलय् जुइत्यंगु दु ।