हनुमानध्वाखा लाय्कुलिइ निर्माण तीव्र

येँ – विश्व सम्पदाया धलखय् लानाच्वंगु हनुमानध्वाखा लाय्कू लागाया सम्पदा व स्मारक पुनःनिर्माण तीव्ररुपं जुयाच्वंगु दु । २०७२ साल बैशाख १२ गतेया तःभुखाचं हनुमानध्वाखा लाय्कू लागाया स्वंगू दर्जन स्वयां अप्वः सम्पदा क्षति जूगु खःसा झिगू सम्पदा पूर्ण रुपं क्षति जूगु खः ।

भुखाचं क्षतिग्रस्त सम्पदामध्ये गद्दी बैठकया पुनःनिर्माण पूर्णरुपं जुइधुंकूगु दुसा हनुमानध्वाखाय् हे च्वंगु कागेश्वरी महाद्यःया देगः नं पुनःनिर्माण याये सिधये धुंकूगु दु । बसन्तपू न्ह्यःने च्वंगु नौतले दरवारनापं सांस्कृतिक व पुरातात्विक ल्याखं अतिकं महत्वपूर्ण मरुसतः पुनःनिर्माणया ज्या न्ह्यानाच्वंगु दु ।

अथे हे वंगु छुं दिं न्ह्यवंनिसें गद्दी बैठक न्ह्यःने च्वंगु माजुदेगःया नं पुनःनिर्माण न्ह्यायेधुंकूगु दुसा बसन्तपुलिइ च्वंगु कुमारि छेँया संवेदनशीलतायात कयाः प्राविधिक अध्ययन व परीक्षण नापं विश्लेषण यायेगु ज्या जुयाच्वंगु दु । स्वनिगःया हे महत्वपूर्ण सम्पदा मध्ये छगू मरुसतः तःभुखाचं पाताः जुइक दुंगु खःसा आः स्वदँया दुने पुनःनिर्माण क्वचायेकेगु लक्ष्य कयातःगु दु ।

अथे हे माजुदेगः निदँया दुने सिधयेकेगु तयारीकथं ज्या जुयाच्वंगु दु । थ्व बाहेकं मेमेगु सम्पदा पुनःनिर्माण यायेगु क्रमय् दुसा गुलिं पुनःनिर्माणया अवस्थाय् दु । मरुसतः पुनःनिर्माणया निंतिं स्थानीयस्तरं हे जुइमाःगु सः थ्वयेवं प्रदेश नं. ३या प्रदेशसभा सदस्य राजेश शाक्यया नेतृत्वय् काष्ठमण्डप पुनःनिर्माण समिति गठन याना ज्या पुनःनिर्माणया ज्या न्ह्यानाच्वंगु दु । अथे हे नौतले दरवार चिनिया पक्ष पुनःनिर्माण यानाच्वंगु दु ।