नेपाःया विषयय् जर्मनीइ गहन सहलह

येँ – युरोपेली राष्ट्र जर्मनीइ नेपाःया विषययात कयाः गहन रुपं सहलह जूगु दु । जर्मनीया कालोन सहरय् जूगु २९ क्वःगु नेपाल दिवसया लसताय् लाकाः उगु सहलह जूगु खः । नेपालय् स्वंगू तहया निर्वाचन क्वचाये धुंकाः राजनीतिक स्थिरता कायम जूगु सन्दर्भय् आः देशं गुकथं आर्थिक समृद्धि हासिल याये फइ धइगु विषययात कयाः उकथंया गहन सहलह जूगु खः ।

जर्मन नेपाल मैत्री संघया ग्वासलय् नेपाल पर्यटन बोर्ड, जर्मनीस्थित नेपाली दूतावास व जर्मनीया म्युजियम कल्चर अफ दि वल्डर्सया सहकार्यय् उगु सहलह ज्याझ्वः जूगु खः ।

ज्याझ्वलय् जर्मनीया निंतिं नेपाःया राजदूत रमेशप्रसाद खनालं नेपालय् शान्ति व स्थिरतालिसें आः पर्यटन विकास व वैदेशिक लगानीया आवश्यक दुगु व उकिया निंतिं पहल यायेगु जुइ धयादीगु दु । उगु सहलह मुँज्याय् कोलोन सहरया मेयर हेनरिट्टे रेकर व नेपाःया निंतिं जर्मनीया राजदूत रुडोल्फ सेफरं नं थःथःगु धारणा तयादीगु खः ।